(វ៉ាស៊ីនតោន)៖ សហរដ្ឋអាមេរិកបានថ្កោលទោសការធ្វើសមយុទ្ធបាញ់គ្រាប់ពិតរបស់ចិននៅជុំវិញកោះតៃវ៉ាន់ រួមទាំងសកម្មភាពយោធារបស់ប៉េកាំងចំពោះប្រទេសដទៃទៀតនៅក្នុងតំបន់ ដោយនិយាយថាវាជាការបង្កើនភាពតានតឹងដោយមិនមានការចាំបាច់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

នៅក្នុងសេចក្ដីថ្លែងការណ៍មួយចេញផ្សាយកាលពីថ្ងៃព្រហស្បតិ៍ ទី១ ខែមករា អ្នកនាំពាក្យរងក្រសួងការបរទេសអាមេរិក លោក Thomas "Tommy" Pigott បាននិយាយថា «សកម្មភាពយោធា និងវោហាសាស្ត្ររបស់ចិនចំពោះកោះតៃវ៉ាន់ និងបណ្ដាប្រទេសក្នុងតំបន់បានបង្កើនភាពតានតឹងដែលមិនមានភាពចាំបាច់ទាល់តែសោះ»។ លោក Pigott បានជំរុញឱ្យចិនមានការអត់ធ្មត់ បញ្ឈប់ ការដាក់សម្ពាធយោធាលើតៃវ៉ាន់ និងត្រឡប់ទៅរកការចូលរួមក្នុងកិច្ចសន្ទនាឡើងវិញ។

ចិននៅក្នុងសប្ដាហ៍នេះបានដឹកនាំការធ្វើសមយុទ្ធយោធាទ្រង់ទ្រាយធំមួយនៅជុំវិញកោះតៃវ៉ាន់ ក្នុងនោះរួមមានទាំងសមយុទ្ធបាញ់គ្រាប់ពិត និងការហាត់សមបិទខ្ទប់កំពង់ផែសំខាន់ៗរបស់ កោះតៃវ៉ាន់។ នេះជាសមយុទ្ធទ្រង់ទ្រាយធំលើកទី៦ ដែលទីក្រុងប៉េកាំងបានធ្វើឡើងនៅជុំវិញតៃវ៉ាន់ក្នុងពេលប៉ុន្មានឆ្នាំថ្មីៗនេះ៕