(មូស្គូ)៖ រុស្ស៉ីចោទប្រកាន់អ៊ុយក្រែនថា បានសម្លាប់មនុស្ស ២៤នាក់ ក្នុងការវាយប្រហារនៅថ្ងៃចូលឆ្នាំសកល ខណៈអ៊ុយក្រែន ក៏បានអះអាងដែរថា មានការវាយប្រហាររបស់រុស្ស៉ីលើទីក្រុងនានា និងហេដ្ឋារចនាសមម្ព័ន្ធថាមពល ហើយបណ្តាលឱ្យជនស៉ីវិលបាត់បង់ជីវិត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២ ខែមករា ឆ្នាំ ២០២៦។

រុស្ស៉ីនិយាយថា ដ្រូនអ៊ុយក្រែនវាយប្រហារសណ្ឋាគារ និងហាងកាហ្វេ ជាទីដែលជនស៉ីវិលកំពុងមើលកាំជ្រួចថ្ងៃឆ្លងឆ្នាំ នៅផ្នែកដែលរុស្ស៉ីកំពុងកាន់កាប់ក្នុងតំបន់ Kherson របស់អ៊ុយក្រែន។ បើតាមក្រសួងការបរទេសរុស្ស៉ី ព័ត៌មានបឋមបង្ហាញថា មនុស្ស២៤នាក់ រួមទាំងកុមារម្នាក់បានស្លាប់ និង ៥០នាក់រងរបួស។

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយកាលពីថ្ងៃព្រហស្បតិ៍ថា ដ្រូនរុស្ស៉ី បានធ្វើឱ្យខូចខាតហេដ្ឋារចនាសម្ព័ន្ធថាមពល នៅក្នុងតំបន់ជាច្រើនរបស់អ៊ុយក្រែន។ រីឯយោធានិយាយថា រុស្ស៉ីបានសម្លាប់ជនស៉ីវិល ដោយការវាយប្រហាររបស់ខ្លួនលើក្រុងនានារបស់អ៊ុយក្រែន។ Reuters មិនអាចផ្ទៀងផ្ទាត់ព័ត៌មាននេះដោយឯករាជ្យបានទេ៕