(ប៉េកាំង)៖ ប្រធានាធិបតីចិន លោក ស៉ី ជីនពីង នឹងត្រូវទទួលស្វាគមន៍ដំណើរទស្សនកិច្ចរបស់ប្រធានាធិបតីកូរ៉េខាងត្បូង លោក Lee Jea Myung នាចុងសប្តាហ៍នេះ ខណៈវាគឺជាសញ្ញាមួយ បង្ហាញពីចេតនារបស់ទីក្រុងប៉េកាំង ក្នុងការពង្រឹងចំណងទាក់ទងជាមួយ​ទីក្រុងសេអ៊ូល ចំពោះមុខការធ្លាក់ដុនដាបខ្លាំងនៃទំនាក់ទំនងរបស់ខ្លួន ជាមួយជប៉ុន ដោយសារតែរឿងកោះតៃវ៉ាន់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី២ ខែមករា ឆ្នាំ២០២៦។

អ្នកវិភាគបានកត់សម្គាល់ថា វាគឺជាកិច្ចប្រជុំលើកទី២ រវាងលោក ស៉ី និងលោក Lee ក្នុងចន្លោះពេលត្រឹម២ខែ ដែលជាគម្លាតខ្លីមួយ​ខុសប្លែកពីធម្មតា អាចជាសញ្ញាបង្ហាញពីបំណងរបស់ចិន ក្នុងការពង្រឹងចំណងទាក់ទងជាមួយទីក្រុងសេអ៊ូល និងក្នុងការជំរុញកិច្ចសហប្រតិបត្តិការសេដ្ឋកិច្ច ក៏ដូចជាទេសចរណ៍រវាងប្រទេសទាំងពីរ។

វាកើតឡើងស្របពេលទំនាក់ទំនងរវាងចិននិងជប៉ុន នាពេលនេះបានស្ថិតក្នុងចំណុចដ៏យ៉ាប់យ៉ឺនបំផុតមួយ បន្ទាប់ពីនាយករដ្ឋមន្រ្តីជប៉ុន លោកស្រី Sanae Takaichi បាននិយាយកាលពីខែវិច្ឆិកា ឆ្នាំ២០២៥ថា ក្នុងករណីចិនសម្រេចបើកការវាយលុកលើកោះតៃវ៉ាន់ នោះអាចនឹងមានការឆ្លើយតបដោយយោធាពីសំណាក់ទីក្រុងតូក្យូ។

អ្នកវិភាគបានយល់ឃើញថា ការអញ្ជើញរបស់លោក ស៉ី ទៅកាន់លោក Lee ដើម្បីបំពេញទស្សនកិច្ចផ្លូវការ គឺជាសកម្មភាពមួយ ត្រូវបានគណនាយ៉ាងហ្មត់ចត់ ដែលមានគោលដៅធ្វើឱ្យកាន់តែស៉ីជម្រៅនូវទំនាក់ទំនងទ្វេភាគី ជាពិសេសមុនពេលលោក Lee បំពេញទស្សនកិច្ចទៅកាន់ប្រទេសជប៉ុន។ រដ្ឋបាលលោក Lee ក៏ធ្លាប់បានអះអាងដែរថា ខ្លួនមានគោលដៅស្តារទំនាក់ទំនងឡើងវិញ​ជាមួយទីក្រុងប៉េកាំង ហើយទទួលស្គាល់ថា ចិនជាដៃគូពាណិជ្ជកម្មធំបំផុតរបស់កូរ៉េខាងត្បូង។

ការប្រែប្រួលនេះ គឺបន្ទាប់ពីទំនាក់ទំនងកូរ៉េខាងត្បូង-ចិន បានជួបភាពតឹងតែង អំឡុងអតីតប្រធានាធិបតីកូរ៉េខាងត្បូង លោក Yoon Suk Yeol ដោយសារតែគោលនយោបាយរបស់លោក ដែលជិតស្និទ្ធខ្លាំងជាមួយទីក្រុងវ៉ាស៉ីនតោននិងទីក្រុងតូក្យូ ព្រមទាំងការរិះគន់លើចិន ជុំវិញបញ្ហាតៃវ៉ាន់។

គួរបញ្ជាក់ថា ឥឡូវកូរ៉េខាងត្បូង កំពុងព្យាយាមរក្សាតុល្យភាព ប៉ុន្តែហាក់ងាកទៅរកកិច្ចសហប្រតិបត្តិការជាមួយចិន ដើម្បីចៀសវាង​ត្រូវបង្ខំឱ្យចូលពាក់ព័ន្ធក្នុងបញ្ហាណាមួយ ដែលនឹងបង្កការគំរាមកំហែងចំពោះប្រទេសអាស៉ីបូព៌ាមួយនេះ។ កាលពីខែធ្នូ ចុងឆ្នាំមុន លោក Lee បានអះអាងថា រូបលោកនឹងមិនឈរនៅខាងណាមួយឡើយ ក្នុងជម្លោះការទូតរវាងចិននិងជប៉ុន៕