(ប៉េកាំង)៖ ការជូនពរឆ្នាំថ្មីរបស់លោក ស៊ី ជិនភីង ជាប្រពៃណីនយោបាយដ៏មានសារៈសំខាន់មួយរបស់ប្រទេសចិន ដែលមិនត្រឹមតែជាសារអបអរសាទរប្រជាជនទេ ប៉ុន្តែជាឯកសារនយោបាយសង្ខេបបង្ហាញពីទិសដៅអាទិភាព និងទស្សនវិស័យរបស់ រដ្ឋាភិបាលចិនសម្រាប់ឆ្នាំខាងមុខ។ សម្រាប់ឆ្នាំ២០២៦ ការជូនពរនេះត្រូវបានរំពឹងថា នឹងបន្តស្នូលនៃអត្ថន័យនយោបាយ សេដ្ឋកិច្ច និងសង្គម ដែលលោកបានលើកឡើងជាបន្តបន្ទាប់ ក្នុងឆ្នាំមុនៗ ប៉ុន្តែត្រូវសម្របខ្លួនទៅនឹងបរិបទថ្មីក្នុងស្រុក និងអន្តរជាតិ។ ការជូនពរឆ្នាំ២០២៦ ទំនងជានឹងផ្តោតលើស្ថិរភាព និងការអភិវឌ្ឍប្រកបដោយ​គុណភាពខ្ពស់ ដែលនៅក្នុងបរិបទសេដ្ឋកិច្ចពិភពលោក ដែលនៅតែប្រឈមនឹងភាពមិនប្រាកដប្រជា លោក ស៊ី ជិនភីង តែងតែប្រើសុន្ទរកថាជូនពរ​ឆ្នាំថ្មី ដើម្បីលើកទឹកចិត្តឱ្យប្រជាជនមានជំនឿលើសមត្ថភាពខ្លួនឯង និងលើប្រព័ន្ធរដ្ឋ។ សម្រាប់ឆ្នាំ២០២៦ នេះ អត្ថន័យ “ការអភិវឌ្ឍដែលផ្អែកលើប្រជាជនជាចម្បង” នឹងនៅតែជាគោលការណ៍ស្នូល ដោយផ្តោតលើការងារ ប្រាក់ចំណូល សុខុមាលភាព និងការកាត់បន្ថយភាពមិនស្មើគ្នានៅក្នុងសង្គម។

ជាមួយគ្នានេះដែរ សារជូនពរនេះអាចនឹងបន្តលើកឡើងអំពី វិទ្យាសាស្ត្រ បច្ចេកវិទ្យា និងការច្នៃប្រឌិត។ ក្នុងនាមជាមេដឹកនាំ ដែលផ្តល់សារៈសំខាន់ដល់ការពឹងផ្អែកលើខ្លួនឯងផ្នែកបច្ចេកវិទ្យា លោក ស៊ី ជិនភីង តែងប្រើឱកាសឆ្នាំថ្មីដើម្បីលើក​ទឹកចិត្តអ្នកវិទ្យាសាស្ត្រ សហគ្រាស និងយុវជន។ សម្រាប់ឆ្នាំ២០២៦ ការលើកទឹកចិត្តនេះអាចនឹងភ្ជាប់ជាមួយ ទស្សនវិស័យអភិវឌ្ឍន៍រយៈពេលវែង ដូចជា ការផ្លាស់ប្តូរឌីជីថល និងការអភិវឌ្ឍបៃតង។ មុំទីបី ក្នុងវិមាត្រអន្តរជាតិ ការជូនពរឆ្នាំថ្មីរបស់លោក ស៊ី ជិនភីង ស្ទើរតែតែងមានសារអំពីសន្តិភាព និងសហប្រតិបត្តិការ។ សម្រាប់ឆ្នាំ២០២៦ លោកអាចនឹងបន្តអំពាវនាវឲ្យប្រទេសនានាសហការគ្នា ដើម្បីដោះស្រាយបញ្ហាសកល ដូចជាការប្រែប្រួលអាកាសធាតុ សន្តិសុខស្បៀង និងការអភិវឌ្ឍប្រកបដោយចីរភាព។

សារនេះមិនត្រឹមតែបង្ហាញពីតួនាទីចិនលើឆាកពិភពលោកទេ ប៉ុន្តែថែមទាំងបង្កើនភាពស្របចិត្តក្នុងស្រុកចំពោះ គោលនយោបាយការបរទេសផងដែរ។ បើប្រៀបធៀបការជូនពរឆ្នាំ២០២៦ ជាមួយសារឆ្នាំថ្មីនៅឆ្នាំមុនៗ អាចមើលឃើញនូវ ភាពបន្ត និងការវិវត្ត ក្នុងរបៀបដឹកនាំនិងទស្សនវិស័យនយោបាយរបស់លោក ស៊ី ជិនភីង។ ក្នុងឆ្នាំចុងក្រោយៗ ការជូនពរឆ្នាំថ្មីតែងផ្តោតលើការឆ្លើយតបទៅនឹងវិបត្តិជាក់ស្តែង ដូចជា ការស្តារឡើងវិញក្រោយវិបត្តិសុខភាពសកល ភាពយឺតយ៉ាវនៃសេដ្ឋកិច្ចពិភពលោក និងការប្រែប្រួលនៃបរិបទភូមិសាស្ត្រនយោបាយ។ សម្រាប់ឆ្នាំ២០២៦ ការជូនពរនេះ អាចត្រូវបានយល់ថាជាជំហានផ្លាស់ប្តូរពី “ការឆ្លើយតបវិបត្តិ” ទៅកាន់ “ការរៀបចំអនាគតរយៈពេលវែង”។

សារជាច្រើនផ្តោតលើការរក្សាស្ថិរភាព ការជូនពរឆ្នាំ២០២៦អាចនឹងមានសំឡេងវិជ្ជមាន និងសកម្មជាងមុន ដោយលើកឡើងអំពីទំនុកចិត្តលើសមត្ថភាពខ្លួនឯង និងការចូលរួមរបស់ប្រជាជនទាំងមូលក្នុងការអភិវឌ្ឍប្រទេស។ នេះបង្ហាញពីការប្រែប្រួលពីសារលើកទឹកចិត្តក្នុងស្ថានភាពលំបាក ទៅកាន់សារជំរុញការច្នៃប្រឌិត និងការរីកចម្រើន ប្រកបដោយគុណភាព។ ពីមុខមាត់សង្គម ការជូនពរឆ្នាំ២០២៦អាចនាំមកនូវអត្ថប្រយោជន៍​ក្នុងការបង្កើនស្មារតីរួបរួមជាតិ និងទំនុកចិត្តរបស់ប្រជាជន។ ការលើកឡើងជាបន្តបន្ទាប់​អំពី “ប្រជាជនជាមូលដ្ឋាន” ប្រៀបដូចជាការធានាផ្លូវចិត្តថា ការអភិវឌ្ឍមិនមែនសម្រាប់តួលេខសេដ្ឋកិច្ចតែប៉ុណ្ណោះទេ ប៉ុន្តែសម្រាប់គុណភាពជីវិតរបស់មនុស្ស។ ​វាអាចជំរុញឲ្យសង្គម មានស្ថិរភាព កាត់បន្ថយភាពតានតឹង និងបង្កើនការចូលរួមរបស់ប្រជាជនក្នុងកិច្ចការសាធារណៈ។

ក្នុងវិមាត្រសេដ្ឋកិច្ច ការជូនពរនេះអាចមានតួនាទីជាសញ្ញាសម្រាប់ទីផ្សារ និងសហគ្រាស។ សារដែលផ្តោតលើការច្នៃប្រឌិត បច្ចេកវិទ្យា និងការអភិវឌ្ឍបៃតង អាចជួយបង្កើនទំនុកចិត្តអ្នកវិនិយោគ និងជំរុញការផ្លាស់ប្តូររចនាសម្ព័ន្ធសេដ្ឋកិច្ចទៅទិសដៅ ប្រកបដោយចីរភាព។ បើប្រៀបធៀបនឹងឆ្នាំមុនៗ ដែលការជូនពរមានលក្ខណៈការពារ និងរក្សាស្ថិរភាព ឆ្នាំ២០២៦ អាចត្រូវបានយល់ថាជាឆ្នាំនៃការបង្កើនល្បឿន និងការបង្កើតឱកាសថ្មី។ កម្លាំងចលករដំបូង គឺការច្នៃប្រឌិតផ្អែកលើវិទ្យាសាស្ត្រ និងបច្ចេកវិទ្យា។ បើប្រៀបធៀបនឹងគំរូ​អភិវឌ្ឍបែបប្រពៃណី ដែលពឹងផ្អែកលើកម្លាំងពលកម្មថោក និងធនធានធម្មជាតិ ចិនកំពុង​ជំរុញការបង្កើតតម្លៃបន្ថែមតាមរយៈបច្ចេកវិទ្យាខ្ពស់ ការផលិតឆ្លាតវៃ និងឌីជីថល។ ​សម្រាប់ពិភពខាងត្បូង នេះជាគំរូសំខាន់មួយ ដែលបង្ហាញថា ប្រទេសកំពុងអភិវឌ្ឍអាចឆ្ពោះទៅកាន់សេដ្ឋកិច្ចចំណេះដឹង​ ដោយមិនចាំបាច់ឆ្លងកាត់​គ្រប់ដំណាក់កាល​ដូចប្រទេសឧស្សាហកម្ម​ចាស់ៗ​។​ កម្លាំងចលករទីពីរគឺ​ សេដ្ឋកិច្ចបៃតង និងការអភិវឌ្ឍប្រកបដោយចីរភាព​។ ​ក្នុងការជូនពរឆ្នាំថ្មីឆ្នាំមុនៗ លោក ស៊ី ជិនភីង តែងលើកឡើងអំពីតុល្យភាពរវាងការអភិវឌ្ឍ និងការការពារបរិស្ថាន។

សម្រាប់ឆ្នាំ២០២៦ ទស្សនវិស័យនេះអាចក្លាយជាមូលដ្ឋានសម្រាប់គំរូអភិវឌ្ឍថ្មី​ ដែលបន្សល់​ផលប្រយោជន៍រយៈពេលវែង។ ​សម្រាប់ពិភពខាង​ត្បូង ដែលជាច្រើនប្រទេសកំពុងប្រឈមនឹងបញ្ហាបរិស្ថាន និងអាកាសធាតុ​ គំរូនេះផ្តល់ជាជម្រើស អភិវឌ្ឍដែលមិនបំផ្លាញ​ធនធានសម្រាប់ជំនាន់ក្រោយ។​ កម្លាំងចលករទីបីគឺ​ ការអភិវឌ្ឍផ្អែកលើប្រជាជន​និងការចែកចាយ ផលប្រយោជន៍យុត្តិធម៌។ សារជូនពរឆ្នាំ២០២៦អាចបន្តលើកទឹកចិត្តឲ្យសេដ្ឋកិច្ចបម្រើប្រជាជន​ មិនមែនប្រជាជនបម្រើសេដ្ឋកិច្ច។ ​គោលគំនិតនេះ​មានអត្ថន័យជាគំរូសម្រាប់ពិភពខាងត្បូង ​ដែលប្រទេសជាច្រើនកំពុងប្រឈមនឹង​ភាពមិនស្មើគ្នា និងបញ្ហាសង្គមពី​ការអភិវឌ្ឍមិនសមតុល្យ។ កម្លាំងចលករទីបួនគឺ កិច្ចសហប្រតិបត្តិការអភិវឌ្ឍត្បូង–ត្បូង (South–South cooperation)។ ការជូនពរឆ្នាំថ្មីរបស់លោក ស៊ី ជិនភីង​ ជាញឹកញាប់​បង្ហាញពី ការអំពាវនាវ​ឲ្យមានការចែករំលែកឱកាសអភិវឌ្ឍ។ ​សម្រាប់ឆ្នាំ២០២៦ នេះអាចបន្តជំរុញគំរូ​សហប្រតិបត្តិការ ដែលផ្អែកលើការគោរពគ្នា​ និងផលប្រយោជន៍រួម​ ជាជម្រើសបន្ថែមពីគំរូអភិវឌ្ឍបែបលើ–ក្រោម (top-down) ដែ​លពិភពខាងត្បូងធ្លាប់ជួបប្រទះ។
​
ចំពោះ ពិភពលោកទាំងមូល ការជូនពរឆ្នាំ២០២៦របស់លោក ស៊ី ជិនភីង អាចបន្តមានអត្ថន័យជាសារសន្តិភាព​ និងការអំពាវនាវ ឲ្យមានសហប្រតិបត្តិការអន្តរជាតិ។ ​បើប្រៀបធៀបនឹងឆ្នាំមុនៗ ​សារនេះអាចមានទម្ងន់ខ្លាំងជាងមុន​ ក្នុងការបង្ហាញពី​តួនាទីចិន ក្នុងការចូលរួម​ដោះស្រាយបញ្ហាសកល។ ​វាអាចជួយបន្ថយ​ភាពមិនទុកចិត្តរវាងប្រទេស​ និងជំរុញការសន្ទនាដោយសន្តិវិធី។​

ដូច្នេះ ការជូនពរឆ្នាំ២០២៦ មិនត្រឹមតែបន្តគោលនយោបាយ​ពីអតីតកាលទេ​ ប៉ុន្តែថែមទាំង​បង្ហាញពីការផ្លាស់ប្តូរទៅកាន់អនាគត។​ វាមានសារៈសំខាន់សម្រាប់សង្គមចិន សេដ្ឋកិច្ចជាតិ និងសន្តិភាពពិភពលោក​ ដោយធ្វើឲ្យការជូនពរឆ្នាំថ្មីក្លាយជា ឧបករណ៍នយោបាយ ​និងទស្សនវិស័យដែលមានឥទ្ធិពលលើសកលលោក។​ វាក៏ជាគន្លឹះសម្រាប់ការអភិវឌ្ឍ​​របស់ចិន​ ប៉ុន្តែថែមទាំងផ្តល់ជាគំរូ និងជាបទពិសោធន៍​សម្រាប់ពិភពលោក និងពិភពខាងត្បូង ​ក្នុងការស្វែងរកផ្លូវអភិវឌ្ឍដែលមានស្ថិរភាព យុត្តិធម៌ និងចីរភាព ​ព្រមទាំងអាចត្រូវ​បានបកស្រាយថា​បានបង្ហាញពី កម្លាំងចលករថ្មី (new drivers of growth) ដែលមិនត្រឹមតែមានសារៈសំខាន់ សម្រាប់ប្រទេសចិនប៉ុណ្ណោះទេ ប៉ុន្តែថែមទាំងអាចក្លាយជាគំរូសម្រាប់​ប្រទេសកំពុងអភិវឌ្ឍ​ និងពិភពខាងត្បូងទាំងមូល​ ព្រោះសម្រាប់ប្រជាជនចិន ការជូនពរនេះមិនមែនជាពាក្យអបអរសាទរធម្មតាទេ​ ប៉ុន្តែជាសញ្ញា​នៃទិសដៅ និងក្តីសង្ឃឹមសម្រាប់ឆ្នាំថ្មី​​៕​

ដោយ បណ្ឌិត គី សេរីវឌ្ឍន៍
ប្រធាន​វិទ្យាស្ថាន​សិក្សា​ចិន​ ​​នៃ​​រាជបណ្ឌិត្យ​​