(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅថ្ងៃសុក្រនេះបានសម្រេចតែងតាំងប្រធានចារកម្មយោធា លោក Kyrylo Budanov ជាប្រធានខុទ្ទកាល័យប្រធានាធិបតីថ្មី ដែលជាការរុះរើដ៏ធំមួយនៅក្នុងរដ្ឋបាលរបស់លោក។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

ការតែងតាំងលោក Budanov វ័យ ៣៩ឆ្នាំ ដែលជាអតីតយុទ្ធជនសង្គ្រាមដ៏មានប្រជាប្រិយភាព គឺជាការផ្លាស់ប្តូរយុទ្ធសាស្ត្រដ៏សំខាន់មួយ ខណៈដែលទីក្រុងកៀវកំពុងស្វែងរកការពង្រឹងវិស័យការពារជាតិ និងជំហររបស់ខ្លួននៅក្នុងកិច្ចចរចាសន្តិភាពដែលគាំទ្រដោយសហរដ្ឋអាមេរិក។

លោក Budanov នឹងមកជំនួសតំណែងលោក Andriy Yermak ដែលជាមនុស្សជំនិតរបស់លោក ហ្សេលេនស្គី ប៉ុន្តែបានលាលែងពីតំណែងកាលពីខែវិច្ឆិកា បន្ទាប់ពីផ្ទះរបស់លោកត្រូវបានឆែកឆេរ ពាក់ព័ន្ធនឹងការស៊ើបអង្កេតលើករណីសំណូក ១០០លានដុល្លារក្នុងវិស័យថាមពល។

លោក ហ្សេលេនស្គី បានបញ្ជាក់នៅលើបណ្តាញសង្គម X ថា អ៊ុយក្រែនត្រូវការការយកចិត្តទុកដាក់ខ្លាំងជាងមុនលើសន្តិសុខ យោធា និងការទូត ហើយលោក Budanov មានបទពិសោធន៍ និងភាពរឹងមាំគ្រប់គ្រាន់ដើម្បីផ្តល់លទ្ធផល៕