អ្នកកាសែតជើងចាស់របស់ថៃម្នាក់ ចេញសារព្រមានថា «ថៃនឹងចាញ់កម្ពុជាក្នុងភ្នែកអន្តរជាតិចំពោះការប្រើកម្លាំងទៅដណ្ដើមយកទឹកដី» (Video inside)
03-01-2026 12:56
(បាងកក)៖ លោក Pravit Rojanaphruk អតីតអ្នកកាសែតដ៏ឆ្នើម្នាក់របស់ថៃ បានលើកឡើងពីការព្រមានរបស់លោកកន្លងមកថា ប្រទេសថៃ អាចយកឈ្នះកម្ពុជាក្នុងផ្លូវសង្រ្គាម ប៉ុន្តែនឹងចាញ់នៅក្នុងក្រសែភ្នែករបស់សហគមន៍អន្តរជាតិថា «ជាជនអាក្រក់ឈ្លានពានទឹកដីគេ» បន្ទាប់ពីមានការរាយការណ៍ពីទីភ្នាក់ងារសារព័ត៌មានធំៗជាបន្តបន្ទាប់ អំពីសកម្មភាពយកបន្លាលួស និងទូរកង់តេនឺមកបាំង ខណ្ឌលើទីតាំងដីដែលមានជម្លោះ។យោងតាមការបង្ហោះនៅលើបណ្ដាញសង្គមហ្វេសប៊ុក កាលពីថ្ងៃទី១ ខែមករា ឆ្នាំ២០២៦ លោក Pravit បង្ហាញពីការកត់សម្គាល់របស់លោកថា៖ «ប្រទេសថៃត្រូវបានគេមើលឃើញថា ជាអ្នកឈ្លានពាន និងជាជនអាក្រក់។ នេះគឺជាឧទាហរណ៍នៃការផ្សាយព័ត៌មានពី Al Jazeera ដែលជាបណ្តាញព័ត៌មានទូរទស្សន៍ធំៗទាំងបីរបស់ពិភពលោកដែលផ្សាយជាភាសាអង់គ្លេស បានមើលទូទាំងពិភពលោក (ពីរផ្សេងទៀតគឺ CNN និង BBC)។
អ្នកយកព័ត៌មាន Al Jazeera បាននិយាយថា ប្រទេសថៃបានប្រើប្រាស់កម្លាំងយោធាដើម្បីដណ្តើមយកទឹកដី ចេញពីប្រទេសកម្ពុជា ដោយមិនបាននិយាយថាទាំងនេះជាទឹកដីដែលមានជម្លោះនោះទេ។ នេះធ្វើឱ្យអ្នកទស្សនាមានអារម្មណ៍ថា ប្រទេសថៃប្រៀបដូចជាប្រទេសដ៏ល្បីល្បាញមួយនៅមជ្ឈិមបូព៌ា ដែលតែងតែប្រើប្រាស់កម្លាំងបាយដើម្បីដណ្តើមយកទឹកដី»៕
