(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃសៅរ៍ ទី៣ ខែមករា បាននិយាយថាយោធាអាមេរិកបានផ្ដាច់ចរន្តអគ្គិសនីនៅទូទាំងរដ្ឋធានីការ៉ាកាស ដើម្បីធ្វើប្រតិបត្តិការចាប់ខ្លួន ប្រធានាធិបតីវ៉េណេស៊ុយអេឡា លោក នីកូឡាស់ ម៉ាឌូរ៉ូ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ថ្លែងក្នុងសន្និសីទសារព័ត៌មាន លោក ត្រាំ បានលើកឡើងដូច្នេះថា «វាជាពេលយប់ងងឹត។ ពន្លឺភ្លើងក្នុងទីក្រុងការ៉ាកាសត្រូវបានបិទមួយផ្នែកធំដោយសារជំនាញដ៏ប៉ិនប្រសប់ដែលយើងមាន»។

លោក ដូណាល់ ត្រាំ ក៏បានបង្ហោះរូបភាពមួយសន្លឹករបស់លោកប្រធានាធិបតីវ៉េណេស៊ុយអេឡា នីកូឡាស់ ម៉ាឌូរ៉ូ ស្ថិតនៅលើនាវាចម្បាំងអាមេរិក USS Iwo Jima។ រូបភាពរបស់លោក ម៉ាឌូរ៉ូ ត្រូវបានបង្ហោះនៅលើគណនីនៃបណ្ដាញទំនាក់ទំនងសង្គម Truth Social។ រូបភាពនេះបានបង្ហាញពីលោក ម៉ាឌូរ៉ូ ពាក់អាវប្រផេះ ជាមួយក្រណាត់ខ្មៅបិទភ្នែករបស់លោក និងដៃកាន់ដបទឹក៕