(Sandiago, São Paulo)៖ បណ្តាមេដឹកនាំអាមេរិកឡាទីន កំពុងបែកខ្ញែកដោយសារតែអ្នកមួយចំនួនថ្កោលទោស ហេីយអ្នកខ្លះទៀតរីករាយ ជុំវិញការវាយប្រហារដ៏គួរឱ្យភ្ញាក់ផ្អេីលលើវ៉េណេស៊ុយអេឡា ដែលប្រធានាធិបតីអាមេរិក លោក ដូណាល់ ត្រាំ ចាត់ទុកថាជាលទ្ធផលមួយអាចចាប់ខ្លួនប្រធានាធិបតីវ៉េណេស៊ុយអេឡា នីកូឡាស់ ម៉ាឌូរ៉ូ បាន។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី៤ ខែមករា ឆ្នាំ ២០២៦។

នៅពេលដែលតំបន់ភាគច្រេីនប្រុងប្រយ័ត្នចំពោះការវិលត្រឡប់នៃកិច្ចអន្តរាគមន៍របស់សហរដ្ឋអាមេរិកពេញមួយសតវត្សរ៍ទី ២០ ដែលបានចាត់តាំងរដ្ឋាភិបាលផ្តាច់ការរាប់ចាប់ពីប្រទេសឈីលី​ ដល់ហុងឌូរ៉ាស លោក ម៉ាឌូរ៉ូ ដែលគ្រប់គ្រងវ៉េណេស៊ុយអេឡាក្នុងស្ថានភាពដួលរលំសេដ្ឋកិច្ច​ និងសង្គម គឺជាមេដឹកនាំម្នាក់ដែលគ្មានប្រជាប្រិយភាព និងឯកោខ្លាំង។​ ទន្ទឹមនេះ​ បណ្តាប្រទេសនៅអាមេរិកឡាទីនជាច្រើន បានប្តូរមកក្រោមការដឹកនាំដោយរដ្ឋាភិបាលស្តាំនិយម ដែលមេដឹកនាំភាគច្រើនចាត់ទុករបបយោធាគាំទ្រដោយសហរដ្ឋអាមេរិកនៅសតវត្សចុងក្រោយថា ជាកម្លាំងការពារចាំបាច់ប្រឆាំងនឹងលិទ្ធិសង្គមនិយម​។​ រីឯបញ្ហាក្រុមជនអន្ធពាល Tren de Aragua នៅវ៉េណេស៊ុយអេឡា ក៏បានបញ្ឆេះកំហឹងឱ្យមានការកើនឡើងនូវអ្នកនយោបាយដែលប្តេជ្ញាបង្ក្រាបឧក្រិដ្ឋកម្ម និងអន្តោប្រវេសន៍។

មេដឹកនាំដែលបានថ្កោលទោសប្រតិបត្តិការយោធាអាមេរិកនៅវ៉េណេស៊ុយអេឡា រួមមាន ប្រធានាធិបតីកូឡុំប៊ី លោក Gustavo Petro ប្រធានាធិបតីប្រេស៉ីល លោក Luiz Inacio Lula da Silva ប្រធានាធិបតីជិតផុតអាណត្តិរបស់ឈីលី លោក Gabriel Boric និងប្រធានាធិបតីម៉ិកស៉ិក លោកស្រី Claudia Sheinbaum។

ប៉ុន្តែប្រធានាធិបតីទេីបជាប់ឆ្នោតរបស់ឈីលី លោក Jose Antonio Kast បានសាទរការចាប់ខ្លួនលោក ម៉ាឌូរ៉ូ ដោយនិយាយថាវាគឺជាដំណឹងដ៏អស្ចារ្យសម្រាប់តំបន់។ ក្រៅពីនេះមេដឹកនាំនៅអាមេរិកឡាទីនដែលគាំទ្រប្រតិបត្តិការយោធាអាមេរិកនៅវ៉េណេស៊ុយអេឡា ក៏មានប្រធានាធិបតីអាហ្សង់ទីន Javier Milei ប្រធានាធិបតីអេក្វាទ័រ និងលោក Daniel Noboa។

គួរបញ្ជាក់ថា ក្នុងសន្និសីទសារព័ត៌មាននាយប់ថ្ងៃសៅរ៍ ប្រធានាធិបតីអាមេរិក លោក ដូណាល់ ត្រាំ បាននិយាយថាសហរដ្ឋអាមេរិកនឹងគ្រប់គ្រងវ៉េណេស៊ុយអេឡា រហូតទាល់តែដល់ពេលមួយដែលអាចសម្រេចបាននូវការផ្ទេរអំណាចដោយសុវត្ថិភាព ត្រឹមត្រូវ និងយុត្តិធម៌​ ជាមួយការអនុញាតឱ្យក្រុមហ៊ុនប្រេងអាមេរិកចូលទៅកាន់វ៉េណេស៊ុយអេឡា ដើម្បីបូមយកប្រេងបម្រុងទុក របស់វ៉េណេស៊ុយអេឡាផងដែរ។ លោក ត្រាំ បន្ថែមថាលោកត្រៀមខ្លួនជាស្រេចសម្រាប់ការវាយប្រហារទ្រង់ទ្រាយធំលើកទី២ លើវ៉េណេស៊ុយអេឡា ក្នុងករណីចាំបាច់៕