(សេអ៊ូល)៖ នាថ្ងៃអាទិត្យ ទី៤ ខែមករានេះ ប្រធានាធិបតីកូរ៉េខាងត្បូង លោក Lee Jae Myung បានធ្វើដំណើរទៅកាន់ប្រទេសចិន ក្នុងបំណងជំរុញទំនាក់ទំនងសេដ្ឋកិច្ចជាមួយប៉េកាំងដែលជាដៃគូពាណិជ្ជកម្មដ៏ធំបំផុតរបស់សេអ៊ូល ខណៈព្យាយាមចៀសវាងដឹងឮអំពីបញ្ហាតៃវ៉ាន់។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន AFP។

លោក Lee គឺជាមេដឹកនាំកូរ៉េខាងត្បូងដំបូងគេ ដែលធ្វើទស្សនកិច្ចនៅទីក្រុងប៉េកាំង ក្នុងរយៈពេល ៦ឆ្នាំ ហើយទស្សនកិច្ចរយៈពេល ៤ថ្ងៃរបស់លោក បានកើតឡើងតិចជាងមួយសប្តាហ៍បន្ទាប់ពីចិនធ្វើសមយុទ្ធយោធាជុំវិញកោះតៃវ៉ាន់។

លោក Lee អមដំណើរដោយគណៈប្រតិភូនៃអ្នកដឹកនាំធុរកិច្ច និងបច្ចេកវិទ្យា សង្ឃឹមថានឹងអាចពង្រីកកិច្ចសហប្រតិបត្តិការសេដ្ឋកិច្ច នៅពេលជួបប្រធានាធិបតីចិន លោក ស៉ី ជីនពីង និងមន្ត្រីកំពូលៗផ្សេងទៀត។​ លោកក៏សង្ឃឹមថានឹងអាចប្រើប្រាស់ឥទ្ធិពលចិនចំពោះកូរ៉េខាងជើង ដើម្បីគាំទ្រដល់បំណងពង្រឹងទំនាក់ទំនងជាមួយទីក្រុងព្យុងយ៉ាងផងដែរ។

កូរ៉េខាងត្បូងបានដើរលើខ្សែបន្ទាត់ដ៏ល្អមួយ រវាងប្រទេសចិនដែលជាដៃគូពាណិជ្ជកម្មកំពូលរបស់ខ្លួន និងសហរដ្ឋអាមេរិកដែលជាអ្នកធានាផ្នែកការពារជាតិរបស់ខ្លួន។ លោក Lee ក៏បានចៀសវាងមិននិយាយអំពីភាពតានតឹងរវាងទីក្រុងប៉េកាំង និងទីក្រុងតូក្យូដែលបង្កឡើងដោយការអត្ថាធិប្បាយរបស់នាយករដ្ឋមន្ត្រី លោកស្រី Sanae Takaichi ដែលថាជប៉ុនអាចធ្វើអន្តរាគមន៍ផ្នែកយោធា ប្រសិនបើចិនវាយប្រហារកោះតៃវ៉ាន់៕