(ពិភពលោក)៖ កងកម្លាំងពិសេស Delta Force ត្រូវបានបង្កើតឡើងនៅឆ្នាំ១៩៧៧ ក្រោមកងទ័ពជើងគោកអាមេរិក (US Army) ដោយមានគោលបំណងបង្កើតអង្គភាពមួយ ដែលអាចឆ្លើយតបភ្លាមៗចំពោះ គ្រោះថ្នាក់ធ្ងន់ធ្ងរ ដូចជា ការវាយប្រហារភេរវកម្មអន្តរជាតិ និងវិបត្តិចំណាប់ខ្មាំងនៅគ្រប់ទីកន្លែងលើពិភពលោក។

តាមប្រភពយោធា អង្គភាពនេះស្ថិតក្រោមការគ្រប់គ្រងរបស់ US Special Operations Command និងត្រូវបានចាត់ទុកថាជា ក្រុមទាហានពិសេស «Tier 1 Unit» ដែលមានអំណាច និងសិទ្ធិប្រតិបត្តិការខ្ពស់បំផុត។ សមាជិក Delta Force ត្រូវបានជ្រើសរើសយ៉ាងតឹងរ៉ឹងពីកងទ័ពជំនាញ និងកងពិសេសផ្សេងៗ ដោយត្រូវឆ្លងកាត់ការបណ្តុះបណ្តាលដ៏លំបាក រួមមានការប្រយុទ្ធក្នុងទីក្រុង (CQB) ការបាញ់ឆ្មាំចម្ងាយឆ្ងាយ ការបំផ្លាញច្រកចូល និងការប្រមូលព័ត៌មានសម្ងាត់។

Delta Force បានចូលរួមក្នុងប្រតិបត្តិការសំខាន់ៗជាច្រើននៅជុំវិញពិភពលោក ដូចជា ប្រតិបត្តិការនៅមជ្ឈិមបូព៌ា អាហ្វហ្កានីស្ថាន និងអ៉ីរ៉ាក់ ព្រមទាំងប្រតិបត្តិការសម្ងាត់ប្រឆាំងបណ្តាញភេរវកម្មអន្តរជាតិ ដែលភាគច្រើន មិនត្រូវបានបង្ហាញជាសាធារណៈឡើយ។

អ្នកវិភាគយោធាបញ្ជាក់ថា កងកម្លាំង Delta Force មិនត្រឹមតែជាអង្គភាពយោធាទេ ប៉ុន្តែជាឧបករណ៍យុទ្ធសាស្ត្រសំខាន់មួយ របស់សហរដ្ឋអាមេរិក ក្នុងការការពារសន្តិសុខជាតិ និងការរក្សាឥទ្ធិពលយោធានៅលើឆាកអន្តរជាតិ។ ក្រុមទាហានពិសេសមួយនេះ បានដឹកនាំប្រតិបត្តិការយោធារបស់អាមេរិក ដើម្បីចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro កាលពីថ្ងៃទី៣ ខែមករា ឆ្នាំ២០២៦៕