(វ៉ាស៉ីនតោន)៖ កាលពីថ្ងៃអាទិត្យ ទី៤ ខែមករា ប្រធានាធិបតីអាមេរិក លោក ដូណាល់ ត្រាំ បានព្រមានថា សហរដ្ឋអាមេរិក អាចនឹងបើកការវាយប្រហារយោធាជាលើកទី២ លើវ៉េណេស៊ុយអេឡា ក្រោយការចាប់ខ្លួនប្រធានាធិបតី លោក Nicolas Maduro ប្រសិនបើសមាជិកនៅសេសសល់ក្នុងរដ្ឋាភិបាលវ៉េណេស៊ុយអេឡា មិនព្រមសហការជាមួយ កិច្ចប្រឹងប្រែងរបស់លោក ដើម្បីកែតម្រូវប្រទេសអាមេរិកឡាទីនមួយនេះឡើងវិញ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

នាពេលនេះ លោក Maduro កំពុងស្ថិតក្នុងពន្ធនាគារនៅទីក្រុងញូវយ៉ក ដើម្បីរង់ចាំបង្ហាញខ្លួននៅតុលាការ ក្រោមបទចោទប្រកាន់ ពាក់ព័ន្ធឧកិដ្ឋកម្មគ្រឿងញៀន។ ការចាប់ខ្លួនរូបលោកដោយសហរដ្ឋអាមេរិក បានបង្កភាពមិនច្បាស់លាស់យ៉ាងស៉ីជម្រៅ អំពីដំណាក់កាលបន្ទាប់ សម្រាប់ប្រទេសដែលសម្បូរទៅដោយ​ធនធានប្រេងបម្រុងមួយនេះ។

លោក ត្រាំ បាននិយាយថា រដ្ឋបាលរបស់លោក នឹងធ្វើការជាមួយសមាជិកនៅសេសសល់ ​ក្នុង​រដ្ឋាភិបាលរបស់លោក Maduro ដើម្បីបោសសំអាតការរត់ពន្ធគ្រឿងញៀន និងធ្វើកំណែទម្រង់ឧស្សាហកម្មប្រេងរបស់វ៉េណេស៊ុយអេឡា ជាជាងជំរុញឱ្យមានការបោះឆ្នោតភ្លាមៗ ដើម្បីមានរដ្ឋាភិបាលថ្មី។ ក្រុមមន្រ្តិជាន់ខ្ពស់នៃរដ្ឋាភិបាលលោក Maduro ដែលនៅបន្តគ្រប់គ្រងប្រទេស បានហៅការចាប់ខ្លួននិងឃុំឃាំងលោក Maduro រួមទាំងភរិយាលោក លោកស្រី Cilia Flores ថាជាការចាប់ជំរិត។

អនុប្រធានាធិបតីវ៉េណេស៊ុយអេឡា លោកស្រី Delcy Rodriguez ដែលមានតួនាទីជារដ្ឋមន្រ្តីប្រេងផងដែរ បានឡើងជាមេដឹកនាំស្តីទី ក្រោមការបង្គាប់របស់តុលាការកំពូល និងការគាំទ្រពីយោធាវ៉េណេស៊ុយអេឡា ហើយលោកស្រី បានប្រកាសថា លោក Maduro នៅតែបន្តជាប្រធានាធិបតី។ លោក ត្រាំ បានគំរាមថា លោកស្រី Rodriguez អាចនឹងជួបផលវិបាកធំជាងលោក Maduro ទៅទៀត ប្រសិនបើលោកស្រីមិនព្រមធ្វើអ្វី ដែលលោកចាត់ទុកថា ជារឿងត្រឹមត្រូវ។

គួរបញ្ជាក់ថា រដ្ឋបាលលោក ត្រាំ បានអះអាងថា ការចាប់ខ្លួនលោក Maduro គឺជាបេសកកម្មអនុវត្តច្បាប់ ដើម្បីនាំខ្លួនលោក មកទទួលទោសក្រោមបទចោទប្រកាន់ព្រហ្មទណ្ឌ របស់សហរដ្ឋអាមេរិក កាលពីឆ្នាំ២០២០ រួមមានទាំងបទល្មើសភេរវកម្មគ្រឿងញៀន។ ប៉ុន្តែលោក ត្រាំ ក៏បាននិយាយថា ក្រុមហ៊ុនប្រេងអាមេរិក ត្រូវការសិទ្ធិពេញលេញ​ ដើម្បីទាញយកធនធានប្រេងបម្រុងដ៏ធំមហាសាលរបស់វ៉េណេស៊ុយអេឡា ហើយថាលំហូរជនចំណាកស្រុកវ៉េណេស៊ុយអេឡាមកកាន់​សហរដ្ឋអាមេរិក ក៏ជាកត្តានាំទៅដល់ការសម្រេចចិត្តចាប់ខ្លួន លោក Maduro ផងដែរ។

ជាច្រើនខែមកហើយ ចំពោះមុខការបង្កើនវត្តមានយោធាទ្រង់ទ្រាយធំរបស់អាមេរិក នៅតំបន់ Caribbean រដ្ឋាភិបាលវ៉េណេស៊ុយអេឡា បានចោទថា លោក ត្រាំ មានមហិច្ឆតាចង់ដណ្តើមកាន់កាប់ធនធានធម្មជាតិ របស់ប្រទេសអាមេរិកឡាទីនមួយនេះ ក្រោមលេសជាយុទ្ធនាការបង្រ្កាបគ្រឿងញៀន៕