(ប៉េកាំង)៖ កាលពីថ្ងៃទី៤ ខែមករា រដ្ឋាភិបាលនៃប្រទេសជាច្រើនបានចេញផ្សាយសេចក្តីថ្លែងការណ៍ ដើម្បីថ្កោលទោសយ៉ាងខ្លាំងក្លា ចំពោះប្រតិបត្តិការយោធារបស់សហរដ្ឋអាមេរិក ដែលធ្វើឡើងចំពោះវ៉េណេស៊ុយអេឡាថា ជាទង្វើល្មើសនឹងច្បាប់អន្តរជាតិ និងបំពានអធិបតេយ្យភាពរបស់វ៉េណេស៊ុយអេឡា ហើយអំពាវនាវឱ្យដោះស្រាយវិបត្តិតាមរយៈកិច្ចសន្ទនាដោយសន្តិវិធី និងគោរពតាមឆន្ទៈរបស់ប្រជាជនវ៉េណេស៊ុយអេឡា។

ថ្ងៃដដែល រដ្ឋាភិបាលនៃប្រទេសចំនួន៦ រួមមានប្រេស៊ីល ស៊ីលី កូឡុំប៊ី ម៉ិកស៊ិក អ៊ុយរូហ្កាយនិងអេស្ប៉ាញ បានចេញផ្សាយសេចក្តីថ្លែងការណ៍រួមថា ប្រតិបត្តិការយោធាឯកតោភាគីរបស់សហរដ្ឋអាមេរិកនៅលើដែនដី វ៉េណេស៊ុយអេឡាគឺល្មើសនឹង《ធម្មនុញ្ញអង្គការសហប្រជាជាតិ》និងគោលការណ៍ជាមូលដ្ឋាននៃច្បាប់អន្តរជាតិ ដែលបានបង្កើត “គំរូប្រកបដោយគ្រោះថ្នាក់”សម្រាប់សន្តិភាព និងសន្តិសុខក្នុងតំបន់។ ប្រទេសទាំង៦នេះសម្តែងការព្រួយបារម្ភយ៉ាងខ្លាំង និងការប្រឆាំងយ៉ាងម៉ឺងម៉ាត់ចំពោះរឿងនេះ។

សេចក្តីថ្លែងការណ៍ក៏បានអំពាវនាវឱ្យដោះស្រាយបញ្ហាវ៉េណេស៊ុយអេឡា តាមរយៈកិច្ចសន្ទនាដោយសន្តិវិធីនិងគោរពតាមឆន្ទៈ របស់ប្រជាជនវ៉េណេស៊ុយអេឡា ហើយគូសបញ្ជាក់ថា ដំណើរការនេះចាំបាច់ត្រូវដឹកនាំដោយប្រជាជនវ៉េណេស៊ុយអេឡា ដែលមិនអនុញ្ញាតឱ្យកម្លាំងខាងក្រៅទៅជ្រៀតជ្រែកនោះទេ។

លោក Aleksandar Vučić ប្រធានាធិបតីស៊ែប៊ីបានថ្លែងថា រឿងពាក់ព័ន្ធដែលកើតឡើងនៅវ៉េណេស៊ុយអេឡាបានបង្ហាញថា ច្បាប់អន្តរជាតិនិង《ធម្មនុញ្ញអង្គការសហប្រជាជាតិ》កំពុងបាត់បង់ប្រសិទ្ធភាពជាក់ស្តែង ការដែលសហរដ្ឋអាមេរិក ធ្វើប្រតិបត្តិការយោធា ចំពោះវ៉េណេស៊ុយអេឡាជាការចាប់ផ្តើមដ៏គ្រោះថ្នាក់ ករណីដូចគ្នានេះវាអាចនឹងកើតឡើង នៅគ្រប់ប្រទេសទាំងអស់៕

វិទ្យុមិត្តភាពកម្ពុជាចិន