(ម៉ានីល)៖ ទីភ្នាក់ងារឃ្លាំមើលគ្រោះរញ្ជួយដីអាមេរិក USGS បានឱ្យដឹងនៅថ្ងៃពុធ ទី៧ ខែមករាថាគ្រោះរញ្ជួយដីកម្រិត ៦.៤រ៉ិចទ័រ បានវាយប្រហារលើតំបន់ឆ្នេរនៃភាគខាងត្បូងប្រទេសហ្វីលីពីន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

តាម USGS គ្រោះរញ្ជួយដីខាងលើមានជម្រៅរញ្ជួយទៅក្នុងដី ៥៨.៥គីឡូម៉ែត្រ ខណៈទីភ្នាក់ងារតាមដានគ្រោះរញ្ជួយដីហ្វីលីពីនព្រមានថាអាចនឹងមានការខូចខាត។ តែភ្លាមៗមិនទាន់មាន សេចក្ដីរាយការណ៍ពីការខូចខាត ឬជនរងគ្រោះនៅឡើយទេ ហើយក៏មិនមានការប្រកាសអាសន្នពីរលកស៊ូណាមិនោះដែរ។

USGS បានឱ្យដឹងទៀតថាគ្រោះរញ្ជួយដីត្រូវបានរាយការណ៍ដំបូងថាមានកម្រិត ៦.៧រ៉ិចទ័រ ហើយត្រូវបានទម្លាក់មកនៅ៦.៤រ៉ិចទ័រវិញ និងស្ថិតនៅចម្ងាយប្រហែល ២៧គីឡូម៉ែត្រពីទីក្រុង Santiago ស្ថិតនៅលើកោះ Mindanao របស់ហ្វីលីពីន៕