(ញូវយ៉ក)៖ ក្រុមប្រឹក្សាសន្តិសុខអង្គការសហប្រជាជាតិ នឹងបើកកិច្ចប្រជុំមួយនៅថ្ងៃចន្ទសប្ដាហ៍ក្រោយ ដើម្បីពិភាក្សាពីសង្រ្គាមនៅអ៊ុយក្រែន ខណៈទីក្រុងកៀវកំពុងប្រឈមនឹង ការដាច់ចរន្តអគ្គិសនីទ្រង់ទ្រាយធំដែលបង្កឡើងដោយការវាយប្រហារពីរុស្ស៉ី។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ទីភ្នាក់ងារសារព័ត៌មាន AFP ដោយផ្អែកលើប្រភពដែលខ្លួនទទួលបានក្នុងលក្ខខណ្ឌមិនបញ្ចេញឈ្មោះ បាន​ឱ្យដឹងទៀតថាសំណើស្នើសុំបើកកិច្ចប្រជុំក្រុមប្រឹក្សាសន្តិសុខ UN របស់អ៊ុយក្រែនត្រូវបានគាំទ្រដោយសមាជិកចំនួន៦ នៃក្រុមប្រឹក្សាសន្តិសុខរួមមាន បារាំង ឡេតូនី ដាណឺម៉ាក ក្រិក លីបេរី និងចក្រភពអង់គ្លេស។

ការវាយប្រហារតាមផ្លូវអាកាសទ្រង់ទ្រាយធំរបស់រុស្ស៉ីដោយបាញ់ដ្រូន និងមីស៊ីល បានធ្វើឱ្យដាច់ចរន្តអគ្គីសនីប៉ះពាល់ដល់ម៉ាស៊ីនកម្ដៅនៅតាមអគារជាច្រើន ក្នុងគ្រាដែល សីតុណ្ហភាពចុះត្រជាក់ដល់ក្រោមសូន្យអង្សាសេ។ វិមានក្រឹមឡាំងក៏បានទទួលស្គាល់ដែរថាយោធារុស្ស៉ីបានបាញ់មីស៊ីលល្បឿនលឿនជាងសំឡេង Oreshnik លើអ៊ុយក្រែន ជាលើកទី២ ចាប់តាំងពីសង្រ្គាមផ្ទុះឡើងកាលពីខែកុម្ភៈ ឆ្នាំ២០២២មក៕