(ហុងកុង)៖ ប៉ូលិសនៅទីក្រុងហុងកុង បានបាញ់បុរសម្នាក់ បន្ទាប់ពីជនរូបនោះប្រដាប់ដោយកាំបិត បានបង្កឱ្យមានការភ័យស្លន់ស្លោ នៅផ្សារទំនើបមួយកន្លែង កាលពីវេលាយប់ថ្ងៃព្រហស្បតិ៍ ទី១៥ ខែមករា។ ជនសង្ស័យបានបាត់បង់ជីវិត ក្រោយពេលបញ្ជូនទៅកាន់​មន្ទីរពេទ្យ ដើម្បីសង្រ្គោះ។ នេះបើតាមការចេញផ្សាយដោយសារព័ត៌មាន China Daily។

ឧប្បត្តិហេតុខាងលើ បានកើតឡើងកាលពីម៉ោងខ្ទង់៧យប់ នៅតំបន់ផ្សារទំនើប Tuen Mun។ យោងតាមវិដេអូអនឡាញ ជនសង្ស័យ ដែលជាបុរសម្នាក់ពាក់អាវពណ៌ស និងស្ពាយកាបូបពណ៌ខ្មៅ បានកាន់កាំបិតនិងស្រែកគំរាមដាក់គេឯង ហើយដើរសំដៅទៅច្រកទ្វារចូល​ផ្សារទំនើបខាងលើ ជាហេតុនាំឱ្យមនុស្សម្នារត់ចេញយ៉ាងប្រសាច និងស្រែកផ្អើលឆោឡោ។ អំឡុងពេលរត់គេច គេឃើញមាន​ស្រ្តី២នាក់បានជំពប់ជើងដួល ហើយជនសង្ស័យ ក៏បានស្រវ៉ាទៅចាប់ស្រ្តីម្នាក់ ហាក់ប្រុងធ្វើជាចំណាប់ខ្មាំង។ ភ្លាមៗ មន្រ្តីប៉ូលិសម្នាក់ ក៏បានសម្រេចចិត្តបើកការបាញ់ប្រហារយ៉ាងហោច២គ្រាប់ ហើយទីបំផុតជនសង្ស័យបានដួលទៅលើដី ខណៈស្រ្តីទាំង២នាក់ បានគេចខ្លួនដោយសុវត្ថិភាព។

គួរបញ្ជាក់ថា មុនឈានដល់ការបាញ់ប្រហារ ប៉ូលិសបានព្យាយាមព្រមានម្តងហើយម្តងទៀត ឱ្យជនសង្ស័យដែលមានអាយុ៣៤ឆ្នាំ ទម្លាក់កាំបិតចុះ ប៉ុន្តែជននោះមិនព្រមធ្វើតាម ហើយថែមទាំងបង្កើនកម្តៅស្ថានការណ៍កាន់តែខ្លាំង។ ប៉ូលិសហុងកុង បាននិយាយថា ពួកគេ​នឹងស៉ើបអង្កេតថា តើជនរូបនោះបានស្ថិតក្រោមឥទ្ធិពលសារធាតុញៀនឬក៏យ៉ាងណា ដោយសារវត្ថុសង្ស័យជាគ្រឿងញៀន ត្រូវបាន​រកឃើញនៅក្នុងកាបូបរបស់គេ៕