(កូប៉ិនហាក)៖ នាថ្ងៃសុក្រ ទី១៦ ខែមករា មេបញ្ជាការនៃបញ្ជាការដ្ឋានតំបន់អាកទិករបស់ប្រទេសដាណឺម៉ាក លោកឧត្តមសេនីយ៍ Soren Andersen បាននិយាយថា ការផ្តោតសំខាន់នាពេលនេះ គឺទប់ទល់សកម្មភាពនានារបស់រុស្ស៉ី ដែលអាចកើតមានឡើង មិនមែនការពារប្រឆាំងការគំរាមកំហែងយោធារបស់សហរដ្ឋអាមេរិកនោះទេ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Andersen បាននិយាយថា ការផ្តោតសំខាន់របស់លោក មិនមែនទៅលើអាមេរិកទេ គឺមិនដូច្នោះទាល់តែសោះ ផ្ទុយទៅវិញ គឺទៅលើរុស្ស៉ី។ ទន្ទឹមគ្នា លោកបានច្រានចោល លទ្ធភាពនៃការផ្ទុះជម្លោះរវាងសម្ព័ន្ធមិត្តក្នុងអង្គការ NATO ដោយនិយាយថា សេណារីយ៉ូបែបនោះ គឺគ្រាន់តែជាសម្មតិកម្មមួយប៉ុណ្ណោះ។ លោក Andersen បានអះអាងថា លោកមើលមិនឃើញឡើយថា ប្រទេសមួយដែលជាសមាជិក NATO វាយប្រហារលើប្រទេសមួយទៀត ដែលជាសមាជិក NATO ដូចគ្នា។

ទោះជាបែបនេះក្តី ឆ្លើយតបក្តីបារម្ភអំពីអាមេរិក ក្រុមប្រទេសអឺរ៉ុប បានបញ្ជូនកងទ័ពមួយចំនួនតូចមកកាន់កោះ Greenland ក្នងសប្តាហ៍នេះ ដើម្បីត្រៀមរៀបចំ សម្រាប់ការធ្វើសមយុទ្ធយោធារបស់ NATO ហោថា Arctic Endurance។ បញ្ជាការដ្ឋានអាកទិករបស់​ដាណឺម៉ាក បានឱ្យដឹងថា ខ្លួនក៏បានអញ្ជើញឱ្យសហរដ្ឋអាមេរិក មកចូលរួមសមយុទ្ធនេះផងដែរ ប៉ុន្តែមិនទាន់ច្បាស់ថា អាមេរិកនឹងចូលរួមឬអត់ទេ។ អំឡុងសមយុទ្ធស្រដៀងគ្នា កាលពីខែកញ្ញា ដាណឺម៉ាកមិនបានអញ្ជើញអាមេរិកឱ្យចូលរួមឡើយ។

គួរបញ្ជាក់ថា ប្រធានាធិបតីអាមេរិក លោក ដូណាល់ ត្រាំ បានទទូចម្តងហើយម្តងទៀតថា កោះ Greenland មានសារសំខាន់ជាខ្លាំង សម្រាប់សន្តិសុខរបស់សហរដ្ឋអាមេរិក ហើយលោកបដិសេធច្រានចោល ជម្រើសនៃការប្រើប្រាស់កម្លាំង ដើម្បីគ្រប់គ្រងដែនកោះតំបន់អាកទិកមួយនេះ ដែលជាផ្នែកនៃប្រទេសដាណឺម៉ាក៕