(ហ្សាការតា)៖ អាជ្ញាធរឥណ្ឌូណេស៊ីបានប្រកាសនៅថ្ងៃអាទិត្យនេះថា ខ្លួនបានរកឃើញបំណែកយន្តហោះឃ្លាំមើលជលផលដែលបាត់ខ្លួន និងបានស្រង់យកសាកសពមនុស្សម្នាក់ក្នុងចំណោម ១០នាក់ដែលនៅលើយន្តហោះ នៅតំបន់ភ្នំដែលមានអ័ព្ទក្នុងខេត្តស៊ូឡាវេស៊ីខាងត្បូង ( South Sulawesi)។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

យន្តហោះប្រភេទ ATR 42-500 នេះបានបាត់បង់ការទាក់ទងជាមួយប្រព័ន្ធត្រួតពិនិត្យចរាចរណ៍ដែនអាកាសកាលពីរសៀលថ្ងៃសៅរ៍។ នៅលើយន្តហោះមានសហសេវិក ៧នាក់ និងអ្នកដំណើរ ៣នាក់ ដែលជាមន្ត្រីរបស់ក្រសួងកិច្ចការសមុទ្រ និងជលផល។

មន្ត្រីទីភ្នាក់ងារសង្គ្រោះ លោក អាន់ឌី ស៊ុលតង់ (Andi Sultan) បានឱ្យដឹងថា ក្រុមជួយសង្គ្រោះបានប្រទះឃើញបំណែកយន្តហោះនៅទីតាំងផ្សេងៗគ្នានៅជុំវិញភ្នំ Bulusaraung នៅព្រឹកថ្ងៃអាទិត្យ រួមទាំងបំណែកបង្អួច និងតួខ្លួនយន្តហោះ។ បន្ទាប់មកនៅពេលរសៀល ពួកគេបានរកឃើញសាកសពជនរងគ្រោះម្នាក់នៅក្នុងជ្រោះប្រហែល ២០០ម៉ែត្រពីកំពូលភ្នំ។

ប្រធានទីភ្នាក់ងារសង្គ្រោះខេត្ត បានបញ្ជាក់ថា បុគ្គលិកចំនួន ១,២០០នាក់ ត្រូវបានដាក់ពង្រាយដើម្បីស្វែងរកអ្នកបាត់ខ្លួនដែលនៅសេសសល់ចំនួន ៩នាក់ទៀត ទោះបីជាមានការលំបាកដោយសារអ័ព្ទក្រាស់ និងស្ថានភាពភ្នំក៏ដោយ៕