(កូដូបា)៖ អាជ្ញាធរអេស្ប៉ាញបានប្រកាសថា មនុស្សយ៉ាងហោចណាស់ ៣៩នាក់បានស្លាប់នៅភាគខាងត្បូងប្រទេស បន្ទាប់ពីរថភ្លើងល្បឿនលឿនមួយគ្រឿងបានធ្លាក់ផ្លូវ និងបុកជាមួយរថភ្លើងមួយគ្រឿងទៀតដែលមកពីទិសផ្ទុយគ្នា ដែលជាគ្រោះថ្នាក់ផ្លូវដែកដ៏អាក្រក់បំផុតនៅក្នុងប្រទេសចាប់តាំងពីឆ្នាំ២០១៣។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

សោកនាដកម្មខាងលើកើតឡើងនៅម៉ោង ៧:៤៥នាទីយប់ថ្ងៃអាទិត្យ នៅពេលដែលរថភ្លើងមួយខ្សែធ្វើដំណើរពីទីក្រុង Malaga ឆ្ពោះទៅកាន់ទីក្រុង Madrid បានរអិលធ្លាក់ចេញពីផ្លូវដែកនៅក្បែរទីក្រុង Adamuz ជ្រុលចូលទៅផ្លូវដែកមួយខ្សែទៀតជាហេតុធ្វើឱ្យបុកគ្នានឹងរថភ្លើងមួយគ្រឿងទៀតដែលកំពុងធ្វើដំណើរ។ ក្រៅពីអ្នកស្លាប់ មានមនុស្ស ១២២នាក់រងរបួស ដោយក្នុងនោះ ១២នាក់កំពុងស្ថិតក្នុងបន្ទប់សង្គ្រោះបន្ទាន់។

យុវតីម្នាក់ដែលបានរួចជីវិត បានរៀបរាប់ទាំងតក់ស្លុតថា «រថភ្លើងបានផ្អៀងទៅម្ខាង...បន្ទាប់មកអ្វីៗបានងងឹតឈឹង ហើយអ្វីដែលខ្ញុំឮគឺមានតែសំឡេងស្រែក»។ នាងត្រូវបានអ្នកដំណើរផ្សេងទៀតជួយអូសចេញតាមបង្អួចទាំងខ្លួនប្រឡាក់ឈាម ខណៈប្អូនស្រីរបស់នាងត្រូវបានក្រុមពន្លត់អគ្គិភ័យជួយសង្គ្រោះពីគំនរបាក់បែក។

គួរបញ្ជាក់ថា បើតាមក្រុមហ៊ុនផ្លូវដែក Rail operator Iryo មានមនុស្សប្រហែលជា ៣០០នាក់ បានជិះនៅលើរថភ្លើងធ្វើដំណើរពីទីក្រុង Malaga ឆ្ពោះទៅកាន់ទីក្រុង Madrid។ អាជ្ញាធរកំពុងធ្វើ ការស៊ើបអង្កេតលើគ្រោះថ្នាក់នេះ ស្របពេលនាយករដ្ឋមន្ត្រីអេស្ប៉ាញ លោក Pedro Sanchez ក៏បានចូលរួមរំលែកទុក្ខដល់ជនរងគ្រោះផងដែរ៕