(កូឡុំបូ)៖ ត្បូងកណ្តៀងផ្កាយពណ៌ស្វាយមួយគ្រាប់ ទំហំ ៣ ៥៦៣ការ៉ាត់ ដែលត្រូវបានគេអះអាងថា ជាត្បូងប្រភេទនេះធំបំផុតលើពិភពលោក ត្រូវបានដាក់បង្ហាញក្នុងរដ្ឋធានីកូឡុំបូ ប្រទេសស្រីលង្កា កាលពីចុងសប្តាហ៍មុន ដែលម្ចាស់បានត្រៀមខ្លួនរួចរាល់ហើយក្នុងការដាក់លក់ ហើយអាចមានតម្លៃប្រហែល ៣០០លានដុល្លារ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AP នៅថ្ងៃអង្គារ ទី២០ ខែមករា ឆ្នាំ ២០២៦។

លោក Ashan Amarasinghe ដែលជាអ្នកជំនាញខាងត្បូងពេជ្រ និងផ្តល់ប្រឹក្សា បាននិយាយថា ត្បូងរាងមូលហៅថា «Star of Pure Land» គឺជាត្បូងកណ្តៀងពណ៌ស្វាយធម្មជាតិដ៏ធំបំផុតរបស់ពិភពលោក ត្រូវបានកត់ត្រាទុកក្នុងឯកសារ។ លោកបន្ថែមថា ត្បូងនេះមានពន្លឺទម្រង់រាង ៦ជ្រុងដូចផ្កាយ នោះហើយជាចំណុចពិសេសរបស់វា។

ត្បូង​​ប៉ូលារួច​នេះ ​គឺ​ជា​កម្មសិទ្ធិ​របស់​ក្រុម​ Star of Pure Land Team ដែល​បាន​រក្សា​ទុក និងមិនបញ្ចេញឱ្យដឹង ដោយសារតែ​ហេតុផល​សុវត្ថិភាព។ ម្ចាស់ម្នាក់និយាយថា ត្បូងនេះត្រូវបានរកឃើញក្នុងរណ្តៅត្បូងមួយ ជិតទីក្រុង Rathnapura ដែលនៅដាច់ស្រយាលក្នុងប្រទេសស្រីលង្កា ដែលគេស្គាល់ថាជាទីក្រុងនៃត្បូង ក្នុងឆ្នាំ ២០២៣។ គេបានទិញវារួម ជាមួយត្បូងផ្សេងទៀតក្នុងឆ្នាំ ២០២៣ តែប្រហែលពីរឆ្នាំក្រោយមក ទើបម្ចាស់ដឹងថា ជាត្បូងពិសេស។ វាអាចលក់បាន ក្នុងតម្លៃចន្លោះពី ៣០០លានដុល្លារទៅ ៤០០ លានដុល្លារ។ នេះបើតាមអ្នកវាយតម្លៃអន្តរជាតិ។

គួរបញ្ជាក់ថា ត្បូងកណ្តៀងស្រីលង្កា មានភាពល្បីល្បាញ ដោយសារពណ៌ពិសេសៗ ថ្លាច្បាស់ និងពន្លឺចែងចាំង៕