(តូក្យូ)៖ រោងចក្រថាមពលនុយក្លេអ៊ែរធំបំផុតលើពិភពលោក របស់ប្រទេសជប៉ុន នឹងចាប់ផ្តើមដំណើរការឡើងវិញ នាថ្ងៃពុធ ទី២១ ខែមករា ជាលើកដំបូងតាំងពីគ្រោះមហន្តរាយ Fukushima ឆ្នាំ ២០១១ បើទោះជានៅមានការព្រួយបារម្ភផ្នែកសុវត្ថិភាព ក្នុងចំណោមអ្នកស្រុកក៏ដោយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

អភិបាលខេត្ត Niigata បានយល់ព្រមឱ្យបើករោងចក្រនេះឡើងវិញ កាលពីខែមុន ទោះបីជាមានការជំទាស់ពីសាធារណៈមតិ។ ប្រតិបត្តិករក្រុមហ៊ុន Tokyo Electric Power (TEPCO) បាននិយាយថា «ពួកគេ​កំពុង​បន្ត​ការ​រៀបចំ​ ហើយ​នឹងបើក​កុងតាក់បញ្ជាក្រោយ​ម៉ោង ៧យប់​ថ្ងៃ​នេះ ដើម្បី​ដំណើរការ​ម៉ាស៉ីន​រ៉េអាក់ទ័រ»។

មនុស្សជាច្រើនបាននាំគ្នាតវ៉ា កាលពីថ្ងៃអង្គារ ដោយភាគច្រើនជាមនុស្សចាស់។ ពួកគាត់សុខចិត្តប្រឈមនឹងអាកាសធាតុត្រជាក់ ព្រិលធ្លាក់ ដើម្បីសម្តែងការតវ៉ា ក្បែរច្រកចូលរោងចក្រ ដែលនៅជាប់ឆ្នេរសមុទ្រជប៉ុន។ អ្នកស្រុកប្រហែល ៦០ភាគរយ ជំទាស់នឹងការបើករោងចក្រនេះឡើងវិញ ខណៈ ៣៧ភាគរយគាំទ្រ។ នេះបើយោងតាមការស្ទង់មតិដែលធ្វើឡើងកាលពីខែកញ្ញា ឆ្នាំមុន។

រោងចក្រថាមពលនុយក្លេអ៊ែរ Kashiwazaki-Kariwa ត្រូវបានបិទដំណើរការ នៅពេលជប៉ុនសម្រេចផ្អាក ការផលិតថាមពលតាមរយៈនុយក្លេអ៊ែរ បន្ទាប់ពីមហាគ្រោះមហន្តរាយរញ្ជួយដី និងរលកយក្សស៊ូណាមិ ធ្វើឱ្យធ្លាយសារធាតុវិទ្យុសកម្ម ចេញពីម៉ាស៉ីនរ៉េអាក់ទ័រចំនួន៣ នៃរោងចក្រថាមពលនុយក្លេអ៊ែរ Fukushima ក្នុងឆ្នាំ២០១១។ ការបើកឡើងវិញនាថ្ងៃពុធនេះ នៃរោងចក្រថាមពល Kashiwazaki-Kariwa គឺដំណើរការតែម៉ាស៉ីនរ៉េអាក់ទ័រ ១ប៉ុណ្ណោះ ក្នុងចំណោមម៉ាស៉ីនរ៉េអាក់ទ័រសរុបចំនួន ៧៕