ក្រសួងការបរទេសចិន៖ ស្វាគមន៍សហគ្រាសនៃប្រទេសនានា បូករួមទាំងសហគ្រាសអាមេរិកជាដើមក្តាប់ជាប់កាលានុវត្តភាពអភិវឌ្ឍន៍ប្រកបដោយគុណភាពខ្ពស់របស់ប្រទេសចិន
21-01-2026 18:10
(ប៉េកាំង)៖ តាមការផ្សាយដំណឹងបានឱ្យដឹងថា តាមការស្ទង់មតិនារបស់សភាពាណិជ្ជកម្មអាមេរិក នៅប្រទេសចិននាពេលថ្មីៗនេះ បានបង្ហាញថា អាត្រាដែលសហគ្រាសអាមេរិកនៅប្រទេសចិន មានសុទិដ្ឋិនិយមចំពោះការរីកចម្រើននៃទីផ្សារចិនបានកើនឡើងយ៉ាងលេចធ្លោ តាមការប៉ាន់ប្រមាណ សហគ្រាសលើសពីពាក់កណ្តាល នឹងសម្រេចបានផលចំណេញឬបានចំណេញច្រើនជាងឆ្នាំមុន។
ទាក់ទិននឹងករណីនេះ លោក Guo Jiakun អ្នកនាំពាក្យក្រសួងការបរទេសចិនបានលើកឡើងក្នុងសន្និសីទសារព័ត៌មាននាថ្ងៃទី១៩ ខែមករាថា រឿងរ៉ាវជោគជ័យរបស់សហគ្រាសអាមេរិកនៅប្រទេសចិនបានបញ្ជាក់ថា កិច្ចសហប្រតិបត្តិការរវាងប្រទេសចិននិងអាមេរិកបានផ្តល់ផលប្រយោជន៍ទៅវិញទៅមក ហើយការជំរុញទំនាក់ទំនងចិន-សហរដ្ឋអាមេរិកឱ្យវិវឌ្ឍទៅមុខប្រកបដោយស្ថិរភាព រឹងមាំនិងចីរភាពគឺសមស្របនឹងផលប្រយោជន៍រួមរបស់ភាគីទាំងពីរ។
លោក Guo Jiakun បន្តទៀតថា ទីផ្សារចិនជាកាលានុវត្តភាពដ៏ធំសម្រាប់ពិភពលោក ការរៀបផែនការធ្វើអាជីវកម្មនៅប្រទេសចិនមានន័យថា ទទួលបានឱកាសមុនគេ ហើយការវិនិយោគនៅប្រទេសចិន អាចនាំមកនូវផលចំណេញយ៉ាងច្រើន។ យើងស្វាគមន៍សហគ្រាសនៃប្រទេសនានា បូករួមទាំងសហគ្រាសអាមេរិកជាដើមក្តាប់ជាប់ “កាលានុវត្តភាព”អភិវឌ្ឍន៍ប្រកបដោយគុណភាពខ្ពស់របស់ប្រទេសចិន ដើម្បីចែករំលែកផលប្រយោជន៍ពី ទីផ្សារលំដាប់ទ្រីលានយាន់ប្រាក់ចិន៕
វិទ្យុមិត្តភាពកម្ពុជាចិន
