(កូឡាឡាំពួ)៖ គណៈកម្មការប្រឆាំងអំពើពុករលួយម៉ាឡេស៊ី (MACC) បានប្រកាសនៅថ្ងៃពុធនេះថា ខ្លួននឹងចោទប្រកាន់មន្ត្រីយោធាកំពូលពីររូប បន្ទាប់ពីការស៊ើបអង្កេតលើការចោទប្រកាន់ពីបទលាងលុយកខ្វក់ និងអំពើពុករលួយ។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។

អតីតមេបញ្ជាការកងទ័ពជើងគោក លោក Muhammad Hafizuddiean Jantan នឹងត្រូវចោទប្រកាន់ក្រោមច្បាប់លាងលុយកខ្វក់ ខណៈដែលភរិយារបស់លោកក៏ប្រឈមនឹងការចោទប្រកាន់ដូចគ្នា។ ដោយឡែក អតីតមេបញ្ជាការកងកម្លាំងប្រដាប់អាវុធ លោក Mohd Nizam Jaafar នឹងប្រឈមមុខនឹងបទចោទប្រកាន់ពាក់ព័ន្ធនឹងការរំលោភអំណាច ការរំលោភលើទំនុកចិត្ត និងការទទួលអំណោយដោយខុសច្បាប់។

គួរបញ្ជាក់ថា ការចោទប្រកាន់នេះកើតចេញពីការស៊ើបអង្កេតលើគម្រោងលទ្ធកម្មរបស់កងទ័ពដែលសង្ស័យថា មានការស៊ីសំណូក។ លោក Hafizuddiean ត្រូវបានព្យួរមុខតំណែងតាំងពីចុងខែធ្នូ ខណៈលោក Nizam បានចូលនិវត្តន៍ជាផ្លូវការនៅដើមខែនេះ។

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានប្រកាសកាលពីសប្តាហ៍មុនអំពីការបង្កករាល់គម្រោងលទ្ធកម្មដែលពាក់ព័ន្ធនឹងករណីនេះ ដោយលោកបានបន្ថែមនៅថ្ងៃពុធនេះថា រដ្ឋាភិបាលនឹងពិនិត្យឡើងវិញនូវរាល់គម្រោងលទ្ធកម្មទាំងអស់ ដើម្បីធានាថាឆ្លងកាត់ដំណើរការប្រកបដោយតម្លាភាព៕