(ដាវ៉ូស)៖ ប្រធានាធិបតីអាមេរិក លោក ដូណាល់ ត្រាំ បានប្រកាសនៅថ្ងៃព្រហស្បតិ៍នេះថា លោកបានធានាសិទ្ធិ «ចូលប្រើប្រាស់ទាំងស្រុង និងជាអចិន្ត្រៃយ៍» របស់សហរដ្ឋអាមេរិកនៅកោះហ្គ្រីនឡែន តាមរយៈកិច្ចព្រមព្រៀងមួយជាមួយអង្គការណាតូ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងបទសម្ភាសន៍ជាមួយទូរទស្សន៍ Fox Business លោក ត្រាំ បានបញ្ជាក់ថា «វាពិតជាការចូលប្រើប្រាស់ទាំងស្រុង...គ្មានទីបញ្ចប់ គ្មានដែនកំណត់ពេលវេលាទេ»។ ការប្រកាសនេះធ្វើឡើងបន្ទាប់ពីលោកបានបន្ធូរបន្ថយការគំរាមកំហែងពន្ធគយ និងច្រានចោលការប្រើកម្លាំងយោធា។

អគ្គលេខាធិការណាតូ លោក ម៉ាក រុត្តេ (Mark Rutte) បាននិយាយថា សម្ព័ន្ធមិត្តត្រូវតែបង្កើនការប្តេជ្ញាចិត្តចំពោះសន្តិសុខតំបន់អាក់ទិក ដើម្បីទប់ទល់នឹងការគំរាមកំហែងពីរុស្ស៊ី និងចិន ដោយរំពឹងថានឹងអនុវត្តបាននៅដើមឆ្នាំ២០២៦។

ទោះជាយ៉ាងណា នាយករដ្ឋមន្ត្រីដាណឺម៉ាក លោកស្រី មេតេ ហ្វ្រេដេរិកសិន (Mette Frederiksen) បានបញ្ជាក់យ៉ាងច្បាស់ថា មិនមានការចរចាណាមួយជាមួយណាតូទាក់ទងនឹងអធិបតេយ្យភាពរបស់ហ្គ្រីនឡែនទេ។ លោកស្រីទទួលស្គាល់ថា ស្ថានភាពនៅតែ «លំបាក និងធ្ងន់ធ្ងរ» ប៉ុន្តែមានវឌ្ឍនភាពក្នុងការពិភាក្សាអំពីសន្តិសុខរួម។

អ្នកជំនាញបានកត់សម្គាល់ថា កិច្ចព្រមព្រៀងឆ្នាំ១៩៥១ គឺអនុញ្ញាតឱ្យអាមេរិកសាងសង់មូលដ្ឋានយោធានៅហ្គ្រីនឡែនរួចស្រេចទៅហើយ ប៉ុន្តែលោក ត្រាំ ចង់បានប្រព័ន្ធការពារមីស៊ីល «Golden Dome» និងការគ្រប់គ្រងធនធានរ៉ែបន្ថែមទៀត៕