(វ៉ាស៉ីនតោន)៖ ក្នុងឯកសារគោលនយោបាយមួយចេញផ្សាយក្នុងសប្តាហ៍នេះ មន្ទីរបញ្ចកោណយល់ឃើញថា តួនាទីរបស់អាមេរិក គឺមិនលែងសូវចាំបាច់ទូលំទូលាយទៀតហើយ ក្នុងការទប់ស្កាត់កូរ៉េខាងជើង ហើយកូរ៉េខាងត្បូងអាចធ្វើការទទួលខុសត្រូវជាចម្បង ក្នុងរឿងនេះ។ នេះបើតាមដកស្រង់ការផ្សាយចេញពី ទីភ្នាក់ងារព័ត៌មាន Reuters នៅថ្ងៃអាទិត្យ ទី២៥ ខែមករា ឆ្នាំ២០២៦។

ក្នុងឯកសារយុទ្ធសាស្រ្តការពារជាតិ ដែលដឹកនាំគោលនយោបាយរបស់ខ្លួន មន្ទីរបញ្ចកោណដែលជាក្រសួងការពារជាតិរបស់អាមេរិក បាននិយាយថា កូរ៉េខាងត្បូង នាពេលនេះមានសមត្ថភាពរ៉ាប់រង ការទទួលខុសត្រូវជាចម្បងក្នុងការទប់ស្កាត់កូរ៉េខាងជើង ជាមួយការជ្រោមជ្រែងចាំបាច់ ប៉ុន្តែតូចជាងមុនរបស់អាមេរិក។ បើតាមមន្រ្តីអាមេរិក អនុរដ្ឋមន្រ្តីការពារជាតិទទួលបន្ទុកគោលនយោបាយ លោក Elbridge Colby គ្រោងធ្វើដំណើរទៅកាន់​តំបន់អាស៉ីនាសប្តាហ៍ក្រោយ ហើយត្រូវបានរំពឹងថា នឹងចូលទស្សនកិច្ចនៅកូរ៉េខាងត្បូង។

សព្វថ្ងៃកូរ៉េខាងត្បូងទទួលឱ្យឈរជើង កងទ័ពអាមេរិកសរុប ២៨ ៥០០នាក់ ដើម្បីប្រឆាំងការគំរាមកំហែងយោធាពីកូរ៉េខាងជើង ហើយក្នុងឆ្នាំនេះ ទីក្រុងសេអ៊ូល បានបង្កើនកញ្ចប់ថវិកាយោធា៧.៥ភាគរយ។ ប៉ុន្មានឆ្នាំមកនេះ ក្រុមមន្រ្តីអាមេរិកធ្លាប់បង្ហាញ​សញ្ញានៃបំណង ចង់ឱ្យកងកម្លាំងអាមេរិកនៅកូរ៉េខាងត្បូង មានភាពបត់បែនជាងមុន ដើម្បីអាចធ្វើប្រតិបត្តិការនៅក្រៅឧបទ្វីបកូរ៉េ ឆ្លើយតបការគំរាមកំហែងទូលំទូលាយ ដូចជាក្នុងការជួយការពារកោះតៃវ៉ាន់ និងទប់ទល់ការកើនឡើងឥទ្ធិពលយោធារបស់ចិន នៅក្នុងតំបន់។

គួរបញ្ជាក់ថា យ៉ាងណាមិញ កូរ៉េខាងត្បូងធ្លាប់បានជំទាស់គំនិតនៃការផ្លាស់ប្តូរតួនាទីរបស់កងទ័ពអាមេរិក ប៉ុន្តែក៏បានខិតខំប្រឹងប្រែង​បង្កើនសមត្ថភាពការពារជាតិរបស់ខ្លួនផងដែរ ក្នុងរយៈពេល២០ឆ្នាំមកនេះ ក្រោមគោលដៅអាចមានសមត្ថភាពគ្រប់គ្រាន់ ដើម្បីដឹកនាំបញ្ជា​​កងកម្លាំងចម្រុះអាមេរិក-កូរ៉េខាងត្បូង អំឡុងពេលមានសង្រ្គាម។ កូរ៉េខាងត្បូង មានកងទ័ពសរុបប្រមាណ៤៥០ ០០០នាក់។ ដោយឡែក កូរ៉េខាងជើងបានរិះគន់ជាប្រចាំចំពោះវត្តមានយោធាអាមេរិកនៅកូរ៉េខាងត្បូង និងការធ្វើសមយុទ្ធរួមរវាងសម្ព័ន្ធមិត្តទាំងពីរ ដោយទីក្រុងព្យុងយ៉ាងចោទថា វាគឺជាការហាត់សមដើម្បីឈ្លានពានខ្លួន ជំរុញដោយមហិច្ឆតាអនុត្តរភាពរបស់ទីក្រុងវ៉ាស៉ីនតោន៕