(តូក្យូ)៖ ខ្លាឃ្មុំផេនដាដ៏ល្បីល្បាញចំនួន ២ ត្រូវបញ្ជូនចេញពីទីក្រុងតូក្យូត្រឡប់ទៅកាន់ប្រទេសចិនវិញ នាថ្ងៃអង្គារ ទី២៧ ខែមករា ដែលនឹងធ្វើឱ្យជប៉ុនលែងមានសត្វគួរឱ្យស្រលាញ់ប្រភេទនេះ ជាលើកដំបូងក្នុងរយៈពេល ៥០ឆ្នាំ ព្រោះតែភាពល្អក់កករក្នុងទំនាក់ទំនង រវាងប្រទេសជិតខាងទាំងពីរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

កូនភ្លោះខ្លាឃ្មុំផេនដា Lei Lei និង Xiao Xiao ត្រូវបានដឹកតាមរថយន្ត ចេញពីសួនសត្វ Ueno ជាទីកំណើតរបស់ពួកគេ ធ្វើឱ្យអ្នកគាំទ្រជនជាតិជប៉ុនស្តាយស្រណោះ។ Lei Lei និង Xiao Xiao គឺជាផ្នែកមួយនៃ «ការទូត​ខ្លាឃ្មុំ​ផេនដា» របស់​ចិន ដើម្បី​បង្ហាញ​ពីចំណង​មិត្តភាព​​ប៉េកាំង-​តូក្យូ ចាប់​តាំង​ពីប្រទេសទាំងពីរ ភ្ជាប់​ទំនាក់ទំនង​ការទូត​ឡើងវិញក្នុង​ឆ្នាំ ១៩៧២។

ការសម្រេចឱ្យបញ្ជូនខ្លាឃ្មុំទាំងពីរទៅវិញភ្លាមៗ ត្រូវបានប្រកាសកាលពីខែមុន អំឡុងពេលមានជម្លោះការទូតរវាងចិន និងជប៉ុន ដែលផ្តើមចេញពីការអត្ថាធិប្បាយរបស់ លោកស្រី Sanae Takaichi នាយករដ្ឋមន្ត្រីជប៉ុន ជុំវិញបញ្ហាកោះតៃវ៉ាន់។

កាលពីថ្ងៃអាទិត្យចុងសប្តាហ៍កន្លងទៅ សួនសត្វ Ueno បានអញ្ជើញអ្នកឈ្នះការផ្សងសំណាងតាមអនឡាញ ប្រហែល ៤ ៤០០នាក់ឱ្យមើលខ្លាឃ្មុំផេនដានេះ ជាលើកចុងក្រោយ។ អ្នកដែលគ្មានសំបុត្រចូលទៅខាងក្នុង បានឈរនៅខាងក្រៅសួនសត្វ ដោយអ្នកខ្លះពាក់អាវ ស្ពាយកាបូប និងកាន់រូប​តុក្កតាផេនដា ដើម្បី​បង្ហាញ​ពី​ក្តី​ស្រឡាញ់​របស់​ពួក​គេ៕