(បូហ្គោតា)៖ ក្រុមហ៊ុនអាកាសចរណ៍រដ្ឋរបស់កូឡុំប៊ី Satena បានឱ្យដឹងថា យន្តហោះមួយគ្រឿង បានធ្លាក់នៅភាគឦសានប្រទេស នាថ្ងៃពុធ ទី២៨ ខែមករា បណ្តាលឱ្យមនុស្សទាំង១៥នាក់ស្ថិតនៅលើនោះ បាត់បង់ជីវិត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

អាកាសចរណ៍ Satena បានប្រាប់ថា យន្តហោះខាងលើ ដែលជាប្រភេទ Beechcraft 1900 បានហោះចេញពីទីក្រុង Cucuta ដែលស្ថិតនៅព្រំប្រទល់ជាប់វ៉េណេស៊ុយអេឡា ក្នុងការធ្វើដំណើរខ្លីមួយឆ្ពោះទៅក្រុង Ocana។ អ្នកគ្រប់គ្រងចរាចរណ៍ផ្លូវអាកាស បានដាច់ការទាក់ទងជាមួយយន្តហោះនោះ ក្រោយវាហោះឡើងបានត្រឹម១២នាទី។ Satena មិនបានប្រាប់អំពីមូលហេតុអ្វី ដែលនាំឱ្យយន្តហោះធ្លាក់ឡើយ ប៉ុន្តែបាននិយាយថា សញ្ញាប្រកាសភាពអាសន្នរបស់យន្តហោះ មិនត្រូវបានបើកឱ្យដំណើរការទេ។

យោងតាមបញ្ជីឈ្មោះអ្នកដំណើរ គឺក្នុងនោះរួមមានសមាជិកសភានៃតំបន់ Catatumbo លោក Diogenes Quintero និងក្រុមការងាររបស់លោក ព្រមទាំង លោក Carlos Salcedo ដែលជាបេក្ខជនឈរឈ្មោះជាសមាជិកសភាជាតិ សម្រាប់ការបោះឆ្នោតនៅខែមីនាខាងមុខ។

គួរបញ្ជាក់ថា តំបន់ដែលយន្តហោះធ្លាក់នោះ គឺជាតំបន់ភ្នំមួយសម្បូរការដាំដុះស្លឹកកូកា ដែលជាវត្ថុធាតុដើមសម្រាប់ផលិតគ្រឿងញៀនកូកាអ៉ីន ហើយជាទីដែលក្រុមប្រដាប់អាវុធខុសច្បាប់មួយចំនួន ធ្វើប្រតិបត្តិការ៕