(សិង្ហបុរី)៖ ទីភ្នាក់ងារអនុវត្តច្បាប់សមុទ្ររបស់ម៉ាឡេស៊ី បានឱ្យដឹងកាលពីថ្ងៃសៅរ៍ ទី៣១ ខែមករា ថាកប៉ាល់ដឹកប្រេង២គ្រឿងដែលត្រូវបានសង្ស័យថាធ្វើការផ្ទេរប្រេងខុសច្បាប់ត្រូវបានឃាត់ទុក ហើយប្រេងឆៅគិតជាទឹកប្រាក់ ១២៩.៩លានដុល្លារត្រូវបានរឹបអូសនៅក្បែរដែនទឹកនៃរដ្ឋ Penang កាលពីសប្ដាហ៍មុន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ទីភ្នាក់ងារម៉ាឡេស៊ីខាងលើដដែលមិនបានបង្ហើបឱ្យដឹងថាតើប្រេងឆៅខាងលើមានប្រភពដើមមកពីណានោះទេ។ ដែនសមុទ្រម៉ាឡេស៊ីត្រូវបានរាយការណ៍ជាប្រចាំពីសកម្មភាពផ្ទេរប្រេងខុសច្បាប់ ពីកប៉ាល់មួយទៅកប៉ាល់មួយដើម្បីលាក់បាំងពីប្រភពដើមរបស់ប្រេង។ អាជ្ញាធរម៉ាឡេស៊ីកាលពីខែកក្កដា ឆ្នាំមុនបានប្រកាសពីការរឹតបន្តឹងការអនុវត្តច្បាប់នៅជុំវិញតំបន់ក្បែរដែនសមុទ្ររបស់ ខ្លួន។

គួរបញ្ជាក់ថា បើតាមទីភ្នាក់ងារអនុវត្តច្បាប់សមុទ្រម៉ាឡេស៊ី កប៉ាល់ទាំង២ខាងលើត្រូវបានឃាត់ទុកមានដឹកមនុស្ស៥៣នាក់ មានទាំងជនជាតិចិន មីយ៉ាន់ម៉ា អ៉ីរ៉ង់ ប៉ាគីស្ថាន និងឥណ្ឌា។ ចំណែក កាប់ពីទែន២នាក់ នៃកប៉ាល់ទាំង២គ្រឿងត្រូវបានចាប់ខ្លួន និងបញ្ជូនទៅឱ្យក្រុមមន្ត្រីស៊ើបអង្កេតក្នុងរដ្ឋ Penang៕