(ដាម៉ាស)៖ ប្រទេសស៉ីរី បានប្រកាសពីការចាប់ខ្លួនក្រុមមួយ ដែលជាអ្នកនៅពីក្រោយការបាញ់រ៉ុក្កែត ទៅលើអាកាសយានដ្ឋានយោធា Mezzeh ទីក្រុងដាម៉ាស អ្នកស៉ើបអង្កេតរកឃើញថា អាវុធទាំងនោះមានប្រភពមកពីក្រុម ​Hezbollah ដែលគាំទ្រដោយអ៉ីរ៉ង់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២ ខែកុម្ភៈ ឆ្នាំ ២០២៦។

ក្រសួងមហាផ្ទៃស៉ីរី បានឱ្យដឹងថា អង្គភាពសន្តិសុខបានចាប់ខ្លួនសមាជិកទាំងអស់នៃក្រុម ដែលបានវាយប្រហារច្រើនលើកលើអាកាសយានដ្ឋាន ក្នុងរយៈពេលប៉ុន្មានខែថ្មីៗនេះ បន្ទាប់ពីមានការឃ្លាំមើលទីតាំងបាញ់ចេញ ពីតំបន់ជាច្រើននៃរដ្ឋធានីដាម៉ាស។ ក្រសួងបានបន្ថែមថា អាវុធដែលគេប្រើក្នុងការវាយប្រហារគឺមានប្រភពពី Hezbollah របស់លីបង់។ អាជ្ញាធរស៉ីរី ក៏បានរឹបអូសយន្តហោះដ្រូនមួយចំនួនផងដែរ។

Hezbollah បានបដិសេធការចោទប្រកាន់នេះ ដោយនិយាយថា ក្រុមរបស់ខ្លួនមិនមានសកម្មភាព ឬទំនាក់ទំនងជាមួយក្រុមណាមួយ នៅក្នុងប្រទេសស៉ីរីទេ។ តាមកងកម្លាំងសន្តិសុខម្នាក់​ Hezbollah បាន​បន្សល់​ទុក​ឃ្លាំង​ស្តុក​សព្វាវុធ រួម​ទាំងដ្រូននៅ​ផ្នែក​ខ្លះ​នៃ​ប្រទេស​ស៉ីរី បន្ទាប់​ពី​ការដក​កង​កម្លាំង​របស់​ខ្លួន​ចេញ ក្រោយរបបអតីតប្រធានាធិបតី Bashar al-Assad ដួលរលំ៕