(អាប៊ូដាប៊ី)៖ បេសកជនពិសេសរបស់ប្រធានាធិបតីអាមេរិក លោក ស្ទីវ វីតកុហ្វ (Steve Witkoff) បានប្រកាសនៅថ្ងៃព្រហស្បតិ៍នេះថា គណៈប្រតិភូមកពីសហរដ្ឋអាមេរិក អ៊ុយក្រែន និងរុស្ស៊ី បានឈានដល់កិច្ចព្រមព្រៀងផ្លាស់ប្តូរអ្នកទោសចំនួន ៣១៤នាក់ ដែលជាការផ្លាស់ប្តូរលើកដំបូងក្នុងរយៈពេល ៥ខែមកនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក វីតកុហ្វ បានសរសេរនៅលើបណ្តាញសង្គម X យ៉ាងដូច្នេះថា «លទ្ធផលនេះសម្រេចបានពីកិច្ចចរចាសន្តិភាពដែលមានលក្ខណៈលម្អិត និងប្រកបដោយផ្លែផ្កា។ ទោះបីជាការងារសំខាន់ៗនៅសល់ច្រើនទៀតក៏ដោយ ជំហានទាំងនេះបង្ហាញថា ការចូលរួមការទូតជាប្រចាំកំពុងផ្តល់លទ្ធផលជាក់ស្តែង និងជំរុញកិច្ចខិតខំប្រឹងប្រែងដើម្បីបញ្ចប់សង្គ្រាមនៅអ៊ុយក្រែន»។

កិច្ចចរចានេះធ្វើឡើងនៅទីក្រុងអាប៊ូដាប៊ី ដែលអ្នកចរចាកំពូលរបស់អ៊ុយក្រែនបានចាត់ទុកថាមានភាព «ផលិតភាព» តាំងពីថ្ងៃដំបូង។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ក៏ធ្លាប់បានរំពឹងទុកថា កិច្ចចរចានេះនឹងនាំទៅរកការដោះលែងអ្នកទោសផងដែរ។

ទោះជាយ៉ាងណា លោក វីតកុហ្វ មិនបានបញ្ជាក់លម្អិតអំពីចំនួនអ្នកទោសដែលប្រទេសនីមួយៗនឹងត្រូវដោះលែងនោះទេ ប៉ុន្តែបានបន្ថែមថា ការពិភាក្សានឹងបន្ត ហើយវឌ្ឍនភាពបន្ថែមទៀតត្រូវបានរំពឹងទុកនៅប៉ុន្មានសប្តាហ៍ខាងមុខ៕