(កៀវ)៖ កាលពីថ្ងៃព្រហស្បតិ៍សប្តាហ៍នេះ នាយករដ្ឋមន្រ្តី លោក Donald Tusk បានឱ្យដឹងថា ប៉ូឡូញកំពុងរៀបចំកញ្ចប់ជំនួយគិតជាទឹកប្រាក់ ៥៥.៩១លានដុល្លារទៅឱ្យអ៊ុយក្រែន ដែលផ្តោតលើសម្ភារសម្រាប់រថពាសដែក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី៦ ខែកុម្ភៈ ឆ្នាំ ២០២៦។

លោក ​Tusk ​និយាយ​ថា ​ប៉ូឡូញ​អាច​ផ្តល់​យន្តហោះ​ចម្បាំង MiG-29 ដល់​អ៊ុយក្រែន​នៅពេល​ណា​ក៏​បាន ប៉ុន្តែ​លោក ហ្សេលេនស្គី បាន​ប្រាប់រូប​លោក​ថា ទីក្រុង​កៀវ​ប្រហែលជា​ត្រូវការ​ឧបករណ៍​ការពារ​ដែនអាកាសជាង ​ហើយ​លោក​នឹង​ពិភាក្សា​រឿង​នេះ​ជាមួយ​មន្ត្រី​ប៉ូឡូញ រួចឆ្លើយ​តប​ទៅ​ប្រធានាធិបតី​អ៊ុយក្រែន​វិញ​ នាថ្ងៃចន្ទសប្តាហ៍ក្រោយ។ ការប្រកាសផ្តល់ជំនួយនេះ កើតមានឡើងអំឡុងពេលនៃជំនួបរវាងលោក Tusk និងលោក ហ្សេលេនស្គី ក្នុងទីក្រុងកៀវ ជាទីដែលមេដឹកនាំទាំងពីរ ក៏បានចុះហត្ថលេខាលើឯកសារផ្លូវការមួយ ដែលគ្របដណ្តប់លើការផលិតអាវុធរួមគ្នា រវាងប្រទេសប៉ូឡូញ និងអ៊ុយក្រែន។

គួរបញ្ជាក់ថា ប៉ូឡូញ ត្រូវបានគេមើលឃើញថា គឺជាអ្នកគាំទ្រខាងយោធា និងនយោបាយដ៏សំខាន់របស់អ៊ុយក្រែន ចាប់តាំងពីរុស្ស៉ីបើកការឈ្លានពាន ដោយបានផ្តល់នូវអាវុធ ការបណ្តុះបណ្តាល ជំនួយផ្នែកភស្តុភារ និងជួយតស៊ូមតិរកការគាំទ្រពីលោកខាងលិច៕