(វ៉ាស៉ីនតោន)៖ កាសែតអាមេរិក Washington Post បានប្រកាសពីការបញ្ឈប់បុគ្គលិកប្រហែលជាង ៣០ភាគរយ នៃស្ថាប័នរបស់ខ្លួន ដែលនឹងប៉ះពាល់ដល់បុគ្គលិកគ្រប់ផ្នែក ជាពិសេសផ្នែកព័ត៌មានកីឡា ព្រមទាំងព័ត៌មានក្នុងស្រុក និងបរទេស។ នេះបើយោងតាមការចេញផ្សាយដោយនាថ្ងៃព្រហស្បតិ៍ ទី៥ ខែកុម្ភៈ ឆ្នាំ ២០២៦។

និពន្ធនាយករបស់ Washington Post លោក Matt Murray ​បាន​និយាយ​ថា ការ​កាត់​បន្ថយ​ការងារ​នឹង​នាំ​មក​នូវស្ថិរភាព ប៉ុន្តែ​ត្រូវរងការរិះគន់ខ្លាំង​ពី​សំណាក់បុគ្គលិក​ និង​អតីត​ថ្នាក់ដឹកនាំ​មួយចំនួននៃកាសែតនេះ។ លោក Murray ពន្យល់ថា ចរាចរណ៍នៃអ្នកចូលទស្សនាការផ្សាយតាមអនឡាញ បានធ្លាក់ចុះយ៉ាងខ្លាំងក្នុងរយៈពេល ៣ឆ្នាំចុងក្រោយ ចំពោះមុខភាពរីកចម្រើនខ្លាំង ផ្នែកបញ្ញាសិប្បនិម្មិត (AI) ហើយកាសែត Washington Post ហាក់ដើរមិនទាន់ការប្រែប្រួល​នៃយុគសម័យឌីជីថល។

អ្នកកាសែតដែលត្រូវបានបញ្ឈប់ពីការងារ បានប្រើប្រាស់បណ្តាញសង្គមដើម្បីបង្ហាញអារម្មណ៍ ដោយមនុស្សជាច្រើន បានសម្តែងការខឹងសម្បារ ចំពោះការសម្រេចចិត្តកាត់បន្ថយការផ្សាយព័ត៌មានបរទេស។ សមាគម​សារព័ត៌មាន Washington Post Guild បាន​លើកឡើងក្នុងសេចក្តីថ្លែងការណ៍​មួយ​ថា ការ​កាត់បន្ថយបុគ្គលិក​ អាចគ្រាន់តែ​ធ្វើឱ្យ​កាសែត​ចុះខ្សោយ បណ្តេញ​អ្នកអាន​ និង​ធ្វើឱ្យ​ខូច​បេសកកម្ម​របស់​កាសែតប៉ុណ្ណោះ។

នេះជា​ភាព​ប្រែប្រួល​ថ្មីចុងក្រោយបំផុត​ សម្រាប់​កាសែត​ឈានមុខ​គេ​របស់​អាមេរិក ដែល​គ្រប់គ្រង​ដោយ​មហាសេដ្ឋី លោក Jeff Bezos និង​ជា​ស្ថាបនិក​ក្រុមហ៊ុន Amazon។ មុនពេលមានប្រកាស អ្នកឆ្លងឆ្លើយព័ត៌មានបរទេស និងអ្នកយកព័ត៌មានក្នុងស្រុកមួយចំនួន បានអង្វរសុំឱ្យលោក Bezos រក្សាការងាររបស់ពួកគេ។

លោក Bezos បានទិញយកកាសែត Washington Post ក្នុងតម្លៃ ២៥០លានដុល្លារនាឆ្នាំ ២០១៣។ Washington Post បានបាត់បង់អ្នកជាវរាប់ម៉ឺននាក់ត្រឹមមួយប៉ព្រិចភ្នែក ក្រោយប្រកាសថា ខ្លួនមិនគាំទ្របេក្ខជនប្រធានាធិបតីណាម្នាក់ ក្នុងការបោះឆ្នោតប្រធានាធិបតីអាមេរិកឆ្នាំ ២០២៤ ឡើយ ដែលជាការសម្រេចចិត្តដោយមហាសេដ្ឋី Bezos។ ការសម្រេចនេះ ហាក់ប្រាស់ចាកពីប្រពៃណីរាប់ទសវត្សរ៍ ដែលកាសែតនេះតែងគាំទ្របេក្ខជនម្នាក់ នៅក្នុងការបោះឆ្នោតប្រធានាធិបតី ចាប់តាំងពីទសវត្សរ៍ឆ្នាំ ១៩៧០មក ដោយភាគច្រើនជាអ្នកប្រជាធិបតេយ្យ៕