(Zurich)៖ អង្គការនៃវេទិកាសេដ្ឋកិច្ចពិភពលោក (WEF) បានបើកការស៉ើបអង្កេតឯករាជ្យមួយ ទៅលើនាយកប្រតិបតិ្ត (CEO) លោក Borge Brende ដើម្បីបញ្ជាក់ពីទំនាក់ទំនងរបស់លោក ជាមួយពិរុទ្ធជនល្មោភកាម Jeffrey Epstein។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី៦ ខែកុម្ភៈ ឆ្នាំ ២០២៦។

អង្គការរៀបចំកិច្ចប្រជុំកំពូលក្នុងទីក្រុង Davos ដែលមានមូលដ្ឋាននៅទីក្រុងហ្សឺណែវមួយនេះ បានឱ្យដឹងថា ខ្លួនកំពុងស៉ើបអង្កេតព័ត៌មានពីក្រសួងយុត្តិធម៌អាមេរិក ដែលថាលោក Brende បានជួបទទួលទានអាហារពេលល្ងាច លក្ខណៈអាជីវកម្ម ចំនួន ៣លើកជាមួយលោក Epstein ហើយក៏ធ្លាប់ទាក់ទងគ្នាតាមសារអ៉ីមែល និងសារទូរស័ព្ទផងដែរ។

WEF បានចេញសេចក្តីថ្លែងការថា «ការសម្រេចចិត្តនេះ គូសបញ្ជាក់ពីការប្តេជ្ញាចិត្តរបស់ WEF ចំពោះតម្លាភាព និងការរក្សាបាននូវភាពសុចរិតរបស់ខ្លួន»។ តាម WEF លោក Brende អតីត​រដ្ឋមន្ត្រី​ការបរទេស​ន័រវែស ដែល​បាន​កាន់​តំណែង CEO​ តាំងពី​ឆ្នាំ ២០១៧ ​គាំទ្រ​យ៉ាង​ពេញទំហឹង​ចំពោះ​ការស៉ើបអង្កេត ដែល​លោក​បាន​ស្នើសុំ​ដោយ​ខ្លួន​ឯង។ លោក Brende នឹងបន្តភារកិច្ចរបស់លោកជា CEO​ ដដែល ខណៈអ្នកប្រឹក្សាច្បាប់ធ្វើការស៉ើបអង្កេត៕