(វ៉ាស៉ីនតោន)៖ មន្រ្តីអាមេរិកម្នាក់បាននិយាយថា សហរដ្ឋអាមេរិក កំពុងរៀបចំផែនការបញ្ជូនកងទ័ពប្រហែល ២០០នាក់ ទៅកាន់ប្រទេសនីហ្សេរីយ៉ា ដើម្បីបណ្តុះបណ្តាលដល់យោធាអាហ្រ្វិក វាយប្រយុទ្ធជាមួយក្រុម ISIS បន្ទាប់ពីប្រធានាធិបតី ដូណាល់ ត្រាំ បញ្ជាឱ្យមានការវាយប្រហារប្រឆាំង នឹងអ្វីដែលលោកហៅថាគោលដៅពួក ISIS។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី១១ ខែកុម្ភៈ ឆ្នាំ ២០២៦។

យោធាសហរដ្ឋអាមេរិក កាលពីសប្តាហ៍មុន​ អះអាងថាបានបញ្ជូនទ័ពមួយក្រុមតូចទៅនីហ្សេរីយ៉ា តែមិនបញ្ជាក់ចំនួន ដែលជាការទទួលស្គាល់លើកដំបូង អំពីវត្តមានកងកម្លាំងអាមេរិក ចាប់តាំងពីបានវាយប្រហារតាមផ្លូវអាកាសលើប្រទេសនេះ អំឡុងថ្ងៃបុណ្យណូអែល។ តាមមន្ត្រី​អាមេរិកមួយរូប​នេះ​ កងទ័ព​ទាំង ២០០នាក់​នឹង​បន្ថែម​លើ​បុគ្គលិក​យោធា​អាមេរិក​មួយ​ចំនួន​ ដែលស្ថិតក្នុង​ប្រទេស​នីហ្សេរីយ៉ា​រួច​ហើយ ដើម្បី​ជួយ​ដល់កងកម្លាំង​ក្នុង​តំបន់។ ទីបញ្ជាការយោធា​អាមេរិក​នៅ​អាហ្វ្រិក​ មិនទាន់ឆ្លើយតប​​ចំពោះសំណើសុំការអត្ថាធិប្បាយ​ទេ។

គួរបញ្ជាក់ថា នីហ្សេរីយ៉ា ស្ថិតក្រោមសម្ពាធយ៉ាងខ្លាំង ពីទីក្រុងវ៉ាស៉ីនតោន ឱ្យធ្វើសកម្មភាព បន្ទាប់ពីលោក ត្រាំ ចោទប្រកាន់ប្រទេសអាហ្វ្រិកខាងលិចមួយនេះ ថាបានបរាជ័យក្នុងការការពារអ្នកកាន់សាសនាគ្រិស្ត ពីពួកសកម្មប្រយុទ្ធ ISIS ដែលកំពុងធ្វើប្រតិបត្តិការនៅភាគពាយ័ព្យ។ សហរដ្ឋអាមេរិក បានហោះហើរឈ្លបយកការណ៍ ពីប្រទេសហ្គាណា ចាប់តាំងពីចុងខែវិច្ឆិកាមក។ ថ្មីៗនេះ លោក ត្រាំ បាននិយាយថា អាចមានសកម្មភាពយោធាអាមេរិកថែមទៀត នៅក្នុងប្រទេសនីហ្សេរីយ៉ា៕