(គូឡាឡាំពួ)៖ នាថ្ងៃសុក្រ ទី១៣ ខែកុម្ភៈ ប្រធានគណៈកម្មការប្រយុទ្ធប្រឆាំងអំពើពុករលួយនៃប្រទេសម៉ាឡេស៉ី (MACC) លោក Azam Baki បានប្រកាសថា ស្វាគមន៍ឱ្យមានការស៉ើបអង្កេតលើរូបខ្លួន ស្របពេលមានការទាមទារឱ្យលាលែងពីតំណែង ក្រោយផ្ទុះសេចក្តីរាយការណ៍មួយ ដែលអះអាងថា លោកកាន់កាប់ភាគហ៊ុនក្នុងក្រុមហ៊ុនមួយ ដែលលើសពីកម្រិតអនុញ្ញាតដោយច្បាប់​សម្រាប់អ្នកធ្វើការរដ្ឋ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Azam បាននិយាយថា រូបលោកពុំមានអ្វីត្រូវលាក់បាំងឡើយ ខណៈការប្រកាសហិរញ្ញវត្ថុនិងទ្រព្យសម្បត្តិទាំងអស់របស់លោក ត្រូវបានធ្វើឡើងស្របទៅតាមច្បាប់ ហើយលោកជឿជាក់យ៉ាងមុតមាំថា ការពិតនឹងឈ្នះតាមរយៈនីតិវិធីមួយ ដែលយុត្តិធម៌និងឯករាជ្យ។ ក្នុងសប្តាហ៍នេះ សារព័ត៌មាន Bloomberg ដោយផ្អែកលើការប្រកាសឯកសារសាជីវកម្មមួយកាលពីឆ្នាំមុន បានរាយការណ៍ថា លោក Azam បានកាប់កាន់ភាគហ៊ុនចំនួន១៧.៧លានហ៊ុន ក្នុងក្រុមហ៊ុនសេវាកម្មហិរញ្ញវត្ថុមួយ ដែលបច្ចុប្បន្នមានតម្លៃ៨០០ ០០០រីហ្គីត ឬស្មើនឹង២០៥ ០០០ដុល្លារ ពោលគឺលើសយ៉ាងខ្លាំងពីកម្រិតអនុញ្ញាត១០០ ០០០រីងហ្គីត។

សេចក្តីរាយការណ៍ខាងលើ បានញ៉ាំងឱ្យក្រុមសមាជិកសភាបក្សប្រឆាំង និងក្រុមសង្គមស៉ីវិល នាំគ្នាទាមទារជាថ្មីឱ្យលោក Azam លាលែងពីតំណែង ហើយមានការធ្វើកំណែទម្រង់ទ្រង់ទ្រាយធំ ចំពោះអង្គភាពប្រឆាំងអំពើពុករលួយ ក្នុងនោះរួមមានការដកសិទ្ធិ​នាយករដ្ឋមន្រ្តី ក្នុងការតែងតាំងប្រធាន MACC។

គួរបញ្ជាក់ថា សកម្មភាពភាគហ៊ុនរបស់លោក Azam ក៏ធ្លាប់ទទួលរងការរិះគន់ស្រដៀងគ្នា កាលពីឆ្នាំ២០២២ផងដែរ ជុំវិញការចោទប្រកាន់ថា រូបលោកបានកាន់កាប់ភាគហ៊ុនរាប់លានហ៊ុន នៅក្នុងក្រុមហ៊ុនដែលចុះបញ្ជីជាសាធារណៈចំនួន២ នៅឆ្នាំ២០១៥ និងឆ្នាំ២០១៦ ប៉ុន្តែក្រុមនិយតករមូលបត្រនាពេលនោះ បាននិយាយថា ខ្លួនមិនអាចកំណត់ច្បាស់ថា តើលោក Azam ពិតជាបានបំពានច្បាប់ឬយ៉ាងណាទេ៕