(បែរឡាំង)៖ រដ្ឋមន្រ្តីការបរទេសអាល្លឺម៉ង់ លោក Johann Wadephul កាលពីថ្ងៃព្រហស្បតិ៍ ទី១២ ខែកុម្ភៈ បានស្នើឱ្យ​អ្នករាយការណ៍ពិសេសរបស់អង្គការសហប្រជាជាតិ (UN) ប្រចាំនៅដែនដីប៉ាឡេស្ទីន លោកស្រី Francesca Albanese លាលែងពីតំណែង ជុំវិញការអត្ថាធិប្បាយរបស់លោកស្រី ដែលត្រូវមើលឃើញថា បានរិះគន់ចំពោះអ៉ីស្រាអែល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Wadephul បានបង្ហោះសារលើបណ្តាញសង្គម X ថា «ខ្ញុំគោរពប្រព័ន្ធអ្នករាយការណ៍ឯករាជ្យរបស់ UN ក៏ប៉ុន្តែលោកស្រី Albanese បានធ្វើការអត្ថាធិប្បាយមិនសមរម្យជាច្រើន នាពេលកន្លងមកនេះ។ ខ្ញុំថ្កោលទោសការលើកឡើងថ្មីចុងក្រោយរបស់​លោកស្រី ស្តីអំពីប្រទេសអ៉ីស្រាអែល។ លោកស្រីមិនសមនៅកាន់តួនាទីទៀតទេ»។

ថ្លែងតាមវិដេអូក្នុងវេទិកាមួយ នៅទីក្រុងដូហានៃប្រទេសកាតា កាលពីពេលថ្មីៗនេះ ដែលរៀបចំដោយប្រព័ន្ធផ្សព្វផ្សាយ Al Jazeera លោកស្រី Albanese បានសំដៅលើអ្វីដែលខ្លួនហៅថា សត្រូវរួមរបស់មនុស្សជាតិ បន្ទាប់ពីលោកស្រី បានរិះគន់​ចំពោះភាគច្រើននៃពិភពលោក និងភាគច្រើននៃប្រព័ន្ធផ្សព្វផ្សាយលោកខាងលិចថា បានជួយនាំឱ្យមានអំពើប្រល័យពូជសាសន៍នៅ តំបន់ហ្កហ្សា។ លោកស្រី Albanese បានបន្តថា ច្បាប់អន្តរជាតិប្រៀបដូចជាត្រូវបានយកកាំបិតចាក់ចំបេះដូង ប៉ុន្តែក៏មានឱកាសមួយផងដែរ ដោយសារតែឥឡូវ យើងទាំងអស់គ្នាមើលឃើញថា ពួកយើងក្នុងនាមជាមនុស្សជាតិ គឺមានសត្រូវរួមមួយ។

រដ្ឋមន្រ្តីការបរទេសបារាំង លោក Jean-Noel Barrot ក៏បានរិះគន់ការអត្ថាធិប្បាយរបស់លោកស្រី Albanese ហើយស្នើឱ្យ​លោកស្រីលាលែងពីតួនាទីដូចគ្នា។ លោក Barrot បាននិយាយថា «បារាំងថ្កោលទោសជាខ្លាំង ចំពោះការអត្ថាធិប្បាយរបស់​លោកស្រី Francesca Albanese ដោយវាមិនបានសំដៅទៅរដ្ឋាភិបាលអ៉ីស្រាអែល ដែលគោលនយោបាយគួររងការរិះគន់ទេ តែបែរជាទៅរកអ៉ីស្រាអែល ក្នុងនាមជាប្រជាជននិងប្រជាជាតិមួយ។ ប្រការនេះគឺមិនអាចទទួលយកជាដាច់ខាត»។

គួរបញ្ជាក់ថា ក្រោយមក លោកស្រី Albanese បានចេញមុខបកស្រាយថា ការអត្ថាធិប្បាយរបស់លោកស្រី គឺត្រូវបានយល់ខុស។ បើតាមលោកស្រី ការលើកឡើង អំពីសត្រូវរួមរបស់មនុស្សជាតិ គឺចង់សំដៅលើប្រព័ន្ធ ដែលបានអនុញ្ញាតឱ្យមានអំពើប្រល័យពូជសាសន៍ នៅប៉ាឡេស្ទីន រួមមានលុយ ការបិទបាំង និងសព្វាវុធ ជាដើម ហើយលោកស្រី បានគូសបញ្ជាក់ថា លោកស្រីមិនបាននិយាយសោះឡើយថា អ៉ីស្រាអែលជាសត្រូវរួមរបស់មនុស្សជាតិ៕