(កូប៉ិកហាក)៖ នាថ្ងៃសុក្រ ទី១៣ ខែកុម្ភៈ រដ្ឋមន្រ្តីការពារជាតិនៃប្រទេសដាណឺម៉ាក លោក Troels Lund Poulsen បាននិយាយថា ដាណឺម៉ាកនឹងផ្តល់យន្តហោះចម្បាំង F-35 ៤គ្រឿង ចូលរួមបេសកកម្ម Arctic Sentry របស់អង្គការ NATO។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កាលពីថ្ងៃពុធសប្តាហ៍នេះ NATO បានប្រកាសថា ខ្លួនបានចាប់ផ្តើមបេសកកម្មខាងលើ ដើម្បីពង្រឹងវត្តមាននៅតំបន់អាកទិក ដែលជាផ្នែកមួយនៃកិច្ចប្រឹងប្រែងដើម្បីបន្ធូរបន្ថយភាពតានតឹង នៅក្នុងបក្សសម្ព័ន្ធយោធាលោកខាងលិចមួយនេះ ដែលផ្តើមចេញពី​មហិច្ឆតារបស់ប្រធានាធិបតីអាមេរិក លោក ដូណាល់ ត្រាំ ក្នុងការចង់បានកោះ Greenland ពីប្រទេសដាណឺម៉ាក។

លោក Poulsen បាននិយាយក្នុងសេចក្តីថ្លែងការណ៍ថា «ការចូលរួមចំណែកយន្តហោះ F-35 របស់យើង នឹងពង្រឹងវត្តមានជារួម​នៅក្នុងតំបន់ ហើយសង្កត់ធ្ងន់អំពីតួនាទីរបស់ដាណឺម៉ាក ក្នុងនាមជាសម្ព័ន្ធមិត្តសកម្មមួយ នៅអាកទិកនិងនៅភាគខាងជើងអាត្លង់ទិក»។ លោក Poulsen ក៏រំពឹងដែរថា សហរដ្ឋអាមេរិក នឹងចូលរួមចំណែកក្នុងបេសកកម្ម NATO នេះដូចគ្នា។

គួរបញ្ជាក់ថា ចាប់តាំងពីត្រឡប់មកកាន់អំណាចសាជាថ្មី កាលពីដើមឆ្នាំ២០២៥ លោក ត្រាំ បានទទូចម្តងហើយម្តងទៀតថា សហរដ្ឋអាមេរិកត្រូវតែគ្រប់គ្រងកោះ Greenland ឱ្យបាន ដោយសារតែការគំរាមកំហែងសន្តិសុខពីរុស្ស៉ីនិងចិន ហើយរូបលោក​ថែមទាំងបានលើកឡើងថា អាចនឹងប្រើកម្លាំងយោធាប្រសិនបើចាំបាច់។ យ៉ាងណាមិញ មួយរយៈចុងក្រោយនេះ លោក ត្រាំ ហាក់បានបោះបង់ការទទូចនោះវិញហើយ ជាពិសេសពាក់ព័ន្ធជម្រើសប្រើយោធា ក្រោយអះអាងថា ឈានដល់ការព្រមព្រៀងគ្នា ជាមួយប្រមុខ NATO៕