(ប៉េកាំង)៖ កាលពីយប់ថ្ងៃអាទិត្យ ទី១៥ ខែកុម្ភៈ អាជ្ញាធរចិនបានឱ្យដឹងថា ហេតុការណ៍ផ្ទុះនៅហាងលក់កាំជ្រួចមួយកន្លែង ក្នុងតំបន់ភាគខាងកើតប្រទេស បានសម្លាប់មនុស្ស៨នាក់ ហើយបណ្តាលឱ្យ២នាក់ផ្សេងទៀតរងរបួស។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សហគមន៍នៅតាមទីជនបទក្នុងប្រទេសចិន តែងតែដុតផាវនិងកាំជ្រួចដើម្បីអបអរថ្ងៃបុណ្យឈប់សម្រាក និងព្រឹត្តិការណ៍សំខាន់ៗ ដូចជាបុណ្យចូលឆ្នាំប្រពៃណីចិន ដែលនឹងចាប់ផ្តើមនៅថ្ងៃអង្គារសប្តាហ៍នេះ។ ហេតុការណ៍ផ្ទុះខាងលើ ដែលបង្កឡើងដោយសារតែ​ការដុតកាំជ្រួចមិនបានត្រឹមត្រូវ បានកើតឡើងនៅស្រុក Donghai ខេត្ត Jiangsu កាលពីរសៀលថ្ងៃអាទិត្យ។

គួរបញ្ជាក់ថា អគ្គិភ័យដែលកើតចេញពីការផ្ទុះ ត្រូវបានពន្លត់ទៅវិញនៅប៉ុន្មានម៉ោងក្រោយ ខណៈមនុស្ស៨នាក់ បានបាត់បង់ជីវិត និង​២នាក់បានរងរបួសរលាក ប៉ុន្តែមិនធ្ងន់ធ្ងរទេ។ ក្រសួងគ្រប់គ្រងគ្រាអាសន្នចិន បាននិយាយថា ប្រទេសចិនកំពុងឈានចូលពេលវេលា ដែលនឹងមានប្រើប្រាស់កាំជ្រួចច្រើនបំផុត អំឡុងរដូវបុណ្យចូលឆ្នាំ ហើយបានក្រើនរំលឹកឱ្យ​ប្រជាពលរដ្ឋបង្កើនការប្រុងប្រយ័ត្នខ្ពស់ និងកុំធ្វើសកម្មភាពទាំងឡាយ ដែលអាចនាំឱ្យមានគ្រោះថ្នាក់។ ទន្ទឹមនឹងនោះ ក្រសួងក៏បានចេញសារព្រមានផងដែរ ដល់អាជីវកម្មលក់កាំជ្រួចនិងផាវ នៅទូទាំងប្រទេស ដោយតម្រូវឱ្យមានការត្រួតពិនិត្យពេញលេញ ​​លើហានិភ័យនិងគ្រោះថ្នាក់ផ្នែកសុវត្ថិភាព៕