លោក Xi Jinping ប្រធានរដ្ឋចិនឆ្លើយតបសំបុត្ររបស់មិត្តនៅរដ្ឋ Iowa សហរដ្ឋអាមេរិក
20-02-2026 17:52
(ប៉េកាំង)៖ នៅថ្ងៃទី១៦ ខែកុម្ភៈ លោក Xi Jinping ប្រធានរដ្ឋចិនបានឆ្លើយតបសំបុត្ររបស់មិត្តនៅរដ្ឋIowa សហរដ្ឋអាមេរិក ព្រមនិងផ្ញើកាតជូនពរឆ្នាំថ្មី ដើម្បីសម្តែងការជូនពរឆ្នាំថ្មីប្រពៃណីចិន។
លោក Xi Jinping បានថ្លែងថា កាលពី ៤១ ឆ្នាំមុន ខ្ញុំធ្លាប់បំពេញទស្សនកិច្ចនៅរដ្ឋ Iowa ហើយបានទទួលការស្វាគមន៍យ៉ាងរាក់ទាក់កក់ក្តៅពីលោកអ្នក ការចងចាំដ៏ល្អបវរទាំងនោះ នៅតែដូចជាការចងចាំថ្មីរហូតដល់សព្វថ្ងៃនេះ។ ក្តីសង្ឃឹមនៃទំនាក់ទំនងរវាងចិន និងសហរដ្ឋអាមេរិកស្ថិតនៅលើប្រជាជន គ្រឹះមូលដ្ឋានស្ថិតនៅក្នុងសង្គម អនាគតស្ថិតនៅក្នុងស្រទាប់យុវជន និងភាពរស់រវើកស្ថិតនៅក្នុងតំបន់មូលដ្ឋាន។ មិនថាស្ថានការណ៍មានការប្រែប្រួលយ៉ាងណាក៏ដោយ ក៏ក្តីបំណងនៃការផ្លាស់ប្តូរ និងកិច្ចសហប្រតិបត្តិការរវាងប្រជាជននៃប្រទេសទាំងពីរចិន និងសហរដ្ឋអាមេរិក គឺគ្មានការផ្លាស់ប្តូរឡើយ ហើយចំណងមិត្តភាពរវាងយុវជន នៃប្រទេសទាំងពីរ ដែលយោគយល់គ្នានិងស្រឡាញ់គ្នា គ្មានការផ្លាស់ប្តូរនោះទេ។
លោករំពឹងទុកថា លោកអ្នកនឹងបន្តខិតខំប្រឹងប្រែងដើម្បីពង្រឹងមិត្តភាពក្នុងសង្គមស៊ីវិលរវាងប្រទេសទាំងពីរ និងលើកទឹកចិត្តយុវជនសហរដ្ឋអាមេរិកកាន់តែច្រើនឱ្យក្លាយទៅជាអ្នកបន្តវេនចំណងមិត្តភាពចិន-សហរដ្ឋអាមេរិក និងជាអ្នកជំរុញសន្តិភាព និងមេត្រីភាព សំដៅរួមចំណែកកាន់តែធំធេងដល់ ការអភិវឌ្ឍទំនាក់ទំនងរវាងចិន និងសហរដ្ឋអាមេរិក៕
វិទ្យុមិត្តភាពកម្ពុជាចិន
