(វ៉ាស៊ីនតោន)៖ នាថ្ងៃចន្ទ ទី២៣ ខែកុម្ភៈ សហរដ្ឋអាមេរិកបានចោទប្រកាន់ចិនថា បានពង្រីកឃ្លាំងអាវុធនុយក្លេអ៊ែរយ៉ាងសម្បើម និងលួចធ្វើតេស្តជាសម្ងាត់ ព្រមទាំងទាមទារជាថ្មីឱ្យទីក្រុងប៉េកាំង ចូលរួមក្នុងសន្ធិសញ្ញាគ្រប់គ្រងអាវុធនាពេលអនាគត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Christopher Yeaw ឧបការីរដ្ឋមន្ត្រីការបរទេសអាមេរិក បានថ្លែងនៅទីក្រុងហ្សឺណែវថា សន្ធិសញ្ញាអាវុធនុយក្លេអ៊ែរ New START រវាងអាមេរិកនិងរុស្ស៊ីដែលទើបផុតកំណត់ មានចំណុចខ្វះខាតធ្ងន់ធ្ងរ ដោយសារមិនបានរាប់បញ្ចូលការកសាងអាវុធយ៉ាងឆាប់រហ័ស និងគ្មានតម្លាភាពរបស់ចិន។

លោកបានព្រមានថា ចិនអាចនឹងមានអាវុធនុយក្លេអ៊ែរស្មើអាមេរិកនិងរុស្ស៊ី ក្នុងពេល៤ទៅ៥ឆ្នាំមុខ ហើយនឹងអាចផលិតក្បាលគ្រាប់បានជាង ១,០០០គ្រាប់ នៅត្រឹមឆ្នាំ២០៣០។ ជាមួយគ្នានេះ លោកក៏បានចោទរុស្ស៊ីថាបានជួយជំរុញសមត្ថភាពនុយក្លេអ៊ែររបស់ចិនផងដែរ។ យ៉ាងណាមិញ កន្លងមកចិនតែងតែច្រានចោលការចូលរួមចរចាសន្ធិសញ្ញាត្រីភាគីនេះ។

គួរបញ្ជាក់ថា សន្ធិសញ្ញា New START ដែលបានផុតកំណត់កាលពីថ្ងៃទី៥ ខែកុម្ភៈ បានកំណត់ឱ្យអាមេរិក និងរុស្ស៊ី មានក្បាលគ្រាប់នុយក្លេអ៊ែរដាក់ពង្រាយត្រឹម ១,៥៥០គ្រាប់រៀងខ្លួន ដែលអាមេរិកអះអាងថា ចិនកំពុងខិតជិតតាមទាន់ចំនួននេះ។ លោក Yeaw បានបញ្ជាក់ថា ការផុតកំណត់សន្ធិសញ្ញានេះ ជាឱកាសស័ក្តិសមដែលអនុញ្ញាតឱ្យប្រធានាធិបតី លោក ដូណាល់ ត្រាំ អាចជំរុញការបង្កើត «កិច្ចព្រមព្រៀងថ្មីមួយដ៏ប្រសើរជាងមុន» ដើម្បីឆ្ពោះទៅរកពិភពលោកមួយដែលមានអាវុធនុយក្លេអ៊ែរកាន់តែតិច៕