(ណៃពិដោ)៖ នាថ្ងៃចន្ទ ទី២ ខែមីនា រដ្ឋាភិបាលយោធានៃប្រទេសមីយ៉ាន់ម៉ា បានផ្តល់ការលើកលែងទោសដល់អ្នកទោសចំនួន៧៣០០នាក់ ដែលជាប់ពិរុទ្ធពីបទផ្តល់ការគាំទ្រហិរញ្ញវត្ថុ ឬកន្លែងជ្រកកោនដល់ក្រុមភេរវករ ជាទូទៅសំដៅលើក្រុមចលនាតស៊ូ​ដើម្បីលទ្ធិប្រជាធិបតេយ្យ ដែលប្រឆាំងរបបដឹកនាំរបស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

មនុស្សរាប់ម៉ឺននាក់ត្រូវបានកាត់ទោសដាក់ពន្ធនាគារ ចាប់តាំងពីយោធាមីយ៉ាន់ម៉ា បានធ្វើរដ្ឋប្រហារដណ្តើមអំណាច កាលពីឆ្នាំ២០២១។ ក្រុមសកម្មជនគាំទ្រលទ្ធិប្រជាធិបតេយ្យ និងក្រុមឧទ្ទាមប្រដាប់អាវុធដែលប្រឆាំងរបបសឹក ត្រូវបានចាត់ទុកជា «ក្រុមភេរវករ» ហើយអ្នកណាដែលហ៊ានពាក់ព័ន្ធជាមួយពួកគេ ​ត្រូវប្រឈមការដាក់ទោសទណ្ឌធ្ងន់ធ្ងរ អាចរហូតដល់ជាប់ពន្ធនាគារអស់មួយជីវិត ឬប្រហារជីវិត។

គួរបញ្ជាក់ថា ប៉ុន្មានខែចុងក្រោយនេះ រដ្ឋាភិបាលយោធា បានប្រកាសផ្តល់ការលើកលែងទោស សម្រាប់បទឧក្រិដ្ឋមួយចំនួន ជាទង្វើ​ដែលក្រុមអ្នកវិភាគមើលឃើញថា ជាការប៉ុនប៉ងដើម្បីស្តារមុខមាត់របស់ខ្លួន មុនត្រូវផ្ទេរអំណាចឱ្យរដ្ឋាភិបាលស៉ីវិល ក្រោយ​ការបោះឆ្នោតសកលកាលពីខែមករា។ សភាថ្មីនឹងត្រូវបើកសម័យប្រជុំលើកដំបូង ក្នុងពេល២សប្តាហ៍ទៀត ខណៈការជ្រើសរើស​ប្រធានាធិបតី នឹងធ្វើឡើងនៅអំឡុងដើមខែមេសា។ ប្រមុខរដ្ឋាភិបាលយោធា លោក Min Aung Hlaing ត្រូវបានរំពឹងថា នឹងក្លាយជាប្រធានាធិបតី៕