(ប៉េកាំង)៖ នាថ្ងៃចន្ទ ទី២ ខែមីនា ចិនបានបន្តអំពាវនាវឱ្យមានបទឈប់បាញ់និងកិច្ចចរចាការទូត ដើម្បីបញ្ចប់ជម្លោះនៅមជ្ឈិមបូព៌ា បន្ទាប់ពីវាបានឆាបឆេះឡើងរយៈពេល៣ថ្ងៃហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

អ្នកនាំពាក្យក្រសួងការបរទេសចិន លោកស្រី Mao Ning បានលើកឡើងថា កិច្ចការចាំបាច់បំផុតនាពេលនេះ គឺបញ្ឈប់ប្រតិបត្តិការយោធា និងទប់ស្កាត់ការរីករាលដាលនៃជម្លោះ ហើយលោកស្រីបន្តទទូចឱ្យមានការស្វែងរកដំណោះស្រាយ តាមរយៈកិច្ចសន្ទនានិងការចរចា។

លោកស្រី Mao ក៏បានទទួលស្គាល់ផងដែរថា ពលរដ្ឋចិនម្នាក់បានបាត់បង់ជីវិត នៅរដ្ឋធានីតេហេរ៉ង់ ជាទីដែលអ៉ីស្រាអែល និងសហរដ្ឋអាមេរិក បាននិងកំពុងធ្វើសកម្មភាពវាយប្រហារតាមផ្លូវអាកាស ក្នុងប្រតិបត្តិការដ៏ធំមួយ ដែលបានសម្លាប់មេដឹកនាំកំពូល​របស់អ៉ីរ៉ង់។

គួរបញ្ជាក់ថា អ៉ីរ៉ង់បាននិងកំពុងសងសឹកវិញ ដោយបាញ់មីស៉ីលនិងដ្រូនទៅលើអ៉ីស្រាអែល ព្រមទាំងបណ្តាប្រទេសអារ៉ាប់នៅក្បែរខាង ដែលមានមូលដ្ឋានយោធារបស់អាមេរិក៕