(ណៃពិដោ)​៖ កាលពីថ្ងៃអង្គារ ទី៣ ខែមីនា រដ្ឋាភិបាលយោធានៃប្រទេសមីយ៉ាន់ម៉ា បានប្រកាសថា ចាប់ពីចុងសប្តាហ៍នេះតទៅ រថយន្តឯកជនពាក់កណ្តាល នឹងត្រូវហាមឃាត់មិនឱ្យប្រើប្រាស់លើដងផ្លូវឡើយក្នុងមួយថ្ងៃៗ ដើម្បីសន្សំសំចៃស្តុកប្រេងឥន្ធនៈ ដែលថយចុះដោយសារការផ្ទុះសង្រ្គាមនៅឯតំបន់មជ្ឈិមបូព៌ា។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

រដ្ឋាភិបាលយោធាមីយ៉ាន់ម៉ា បាននិយាយក្នុងសេចក្តីប្រកាសថា ចាប់ពីថ្ងៃសៅរ៍ចុងសប្តាហ៍នេះតទៅ រថយន្តដែលពាក់ស្លាកលេខ មានលេខនៅខាងដើមជាលេខសេស គឺនឹងត្រូវអនុញ្ញាតឱ្យបើកបរលើដងផ្លូវ តែនៅក្នុងថ្ងៃសេសប៉ុណ្ណោះ ដោយបន្សល់ទុកថ្ងៃគូឱ្យ​រថយន្តមានស្លាកលេខថ្ងៃគូ។ រដ្ឋាភិបាលយោធាបានបកស្រាយថា ហេតុផលនៃការដាក់ចេញគោលការណ៍បែបនេះ គឺដោយសារស្ថានការណ៍នយោបាយពិភពលោក និងជម្លោះយោធានៅមជ្ឈិមបូព៌ា។

គួរបញ្ជាក់ថា យានយន្តអគ្គិសនី រថយន្តក្រុង រថយន្តតាក់ស៉ី រថយន្តដឹកទំនិញ រថយន្តសង្រ្គោះបន្ទាន់ និងរថយន្តដឹកជញ្ជូនសំរាម គឺត្រូវបានលើកលែង។ វាមិនទាន់ច្បាស់ភ្លាមៗនៅឡើយទេ ថាតើគោលការណ៍ថ្មីនេះ នឹងត្រូវធានាការអនុវត្តដោយរបៀបណា ឬមានរយៈពេលយូរប៉ុនណា ប៉ុន្តែរដ្ឋាភិបាលយោធាបាននិយាយថា អ្នកបំពាននឹងប្រឈមមុខវិធានការច្បាប់។ ទន្ទឹមគ្នានោះ របបសឹកមីយ៉ាន់ម៉ា ក៏បានព្រមានម្ចាស់អាជីវកម្មក៏ដូចជាសាធារណជនផងដែរ ដោយហាមដាច់ខាតមិនឱ្យប្រមូលទិញប្រេងឥន្ធនៈស្តុកទុក ឬលក់បន្តក្នុងតម្លៃបំប៉ោងខ្ពស់៕