(វ៉ាស៉ីនតោន)៖ សហរដ្ឋអាមេរិក បានឱ្យដឹងនាថ្ងៃពុធ ទី៤ ខែមីនា ថាខ្លួនបានបញ្ជាឱ្យបុគ្គលិកដែលគ្មានភារកិច្ចចាំបាច់ នៅស្ថានកុងស៊ុលចំនួនពីរនៃប្រទេសប៉ាគីស្ថាន និងបុគ្គលិកស្ថានទូតប្រចាំនៅអារ៉ាប៊ីសាអូឌីត ស៉ីប និងអូម៉ង់ ឱ្យចាកចេញពីប្រទេសទាំងអស់នេះ ចំពោះមុខការវាយប្រហារសងសឹកពីសំណាក់អ៉ីរ៉ង់នៅមជ្ឈិមបូព៌ា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

យោងតាមសេចក្តីថ្លែងការណ៍ របស់ស្ថានទូតអាមេរិកប្រចាំប្រទេសប៉ាគីស្ថាន ក្រសួងការបរទេសបញ្ជាឱ្យបុគ្គលិករដ្ឋាភិបាល ដែលគ្មានភារកិច្ចចាំបាច់ និងសមាជិកគ្រួសារ មកពីស្ថានកុងស៊ុលក្នុងទីក្រុង Karachi និងទីក្រុង Lahore ចាកចេញពីប៉ាគីស្ថាន ដោយសារតែ «ហានិភ័យសុវត្ថិភាព»។ ក្រសួងការបរទេសអាមេរិក ​ក៏បានអនុញ្ញាតឱ្យ​បុគ្គលិក​រដ្ឋាភិបាល​ ដែលគ្មានភារកិច្ចចាំបាច់ និង​សមាជិកគ្រួសារ​​ ចាកចេញពី​អារ៉ាប៊ីសាអូឌីត អូម៉ង់ និង​ស៉ីប «ដោយសារ​តែហានិភ័យ​សុវត្ថិភាព» ផងដែរ។

គួរបញ្ជាក់ថា ក្នុង​រយៈពេល​ប៉ុន្មាន​ថ្ងៃ​កន្លង​មក​នេះ ពលរដ្ឋ​អាមេរិក​ជាង ៩ ០០០នាក់​បាន​វិញត្រឡប់​ពីតំបន់​មជ្ឈិមបូព៌ា ទៅ​ដល់ប្រទេសវិញ​ដោយ​សុវត្ថិភាព ក្នុង​នោះ​ជាង ៣០០នាក់​មក​ពី​អ៉ីស្រាអែល៕