(កូឡុំបូ)៖ អាជ្ញាធរស្រីលង្កា បានបញ្ជាក់នាថ្ងៃពុធនេះថា នាវាចម្បាំងរបស់ប្រទេសអ៉ីរ៉ង់មួយគ្រឿង បានលិចនៅក្បែរឆ្នេរសមុទ្ររបស់ខ្លួន ដោយក្រុមសង្គ្រោះបានជួយសង្គ្រោះជីវិតមនុស្សចំនួន ៣២នាក់ និងស្រង់បានសាកសពជាច្រើនផ្សេងទៀតចេញពីផ្ទៃសមុទ្រ។ នេះបើតាមការចេញផ្សាយដោយ​ ទីភ្នាក់ងារសារព័ត៌មាន Reuters។

ប្រភពពីកងទ័ពជើងទឹក និងក្រសួងការពារជាតិស្រីលង្កា បានទម្លាយថា នាវាដែលត្រូវបានកំណត់អត្តសញ្ញាណថាជា IRIS DeSources នេះ ទំនងជារងការវាយប្រហារពីនាវាមុជទឹក នៅតំបន់មហាសមុទ្រឥណ្ឌា ដែលបណ្តាលឱ្យមនុស្សយ៉ាងហោចណាស់ ១០១នាក់បាត់ខ្លួន។ ទោះជាយ៉ាងណា អ្នកនាំពាក្យកងទ័ពជើងទឹកស្រីលង្កា បានច្រានចោលព័ត៌មានស្តីពីចំនួនអ្នកបាត់ខ្លួននេះ និងបដិសេធមិនធ្វើអត្ថាធិប្បាយជុំវិញមូលហេតុនៃការលិចនាវានេះឡើយ ដោយបញ្ជាក់ត្រឹមថា មិនមានឃើញវត្តមាននាវា ឬយន្តហោះផ្សេងទៀតនៅក្បែរកន្លែងកើតហេតុនោះទេ។

គួរបញ្ជាក់ថា អ្នកនាំពាក្យដដែលបានឱ្យដឹងថា ជនរងគ្រោះទាំង ៣២នាក់ដែលត្រូវបានជួយសង្គ្រោះ កំពុងសម្រាកព្យាបាលនៅមន្ទីរពេទ្យរដ្ឋ ក្នុងទីក្រុងកំពង់ផែ Galle ភាគខាងត្បូងប្រទេស។ អាជ្ញាធរស្រីលង្កាបានបើកប្រតិបត្តិការរុករក និងសង្គ្រោះទ្រង់ទ្រាយធំភ្លាមៗ រួមទាំងការប្រើប្រាស់កងទ័ពអាកាសផងដែរ បន្ទាប់ពីទទួលបានសញ្ញាអំពាវនាវសុំជំនួយពីនាវាអ៉ីរ៉ង់៕