(វ៉ាស៉ីនតោន)៖ រដ្ឋាភិបាលអាមេរិក នាថ្ងៃព្រហស្បតិ៍ ទី៥ ខែមីនា បានបន្ធូរបន្ថយទណ្ឌកម្មសេដ្ឋកិច្ចលើរុស្ស៉ី ជាបណ្តោះអាសន្ន ដើម្បីអនុញ្ញាតឱ្យប្រេងរបស់រុស្ស៉ីដែលជាប់គាំងនៅឯសមុទ្រ ត្រូវបានលក់ទៅឱ្យឥណ្ឌា។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP។

ការិយាល័យគ្រប់គ្រងទ្រព្យសម្បត្តិបរទេសនៃក្រសួងហិរញ្ញវត្ថុអាមេរិក បានចេញអាជ្ញាប័ណ្ណដឹកជញ្ជូន និងលក់ប្រេងឆៅ ក៏ដូចជាផលិតផលប្រេងកាត ដែលមានប្រភពដើមពីរុស្ស៉ី ដែលផ្ទុកលើនាវានានា គិតត្រឹមថ្ងៃទី៥ ខែមីនា ទៅឱ្យឥណ្ឌា។ វាក៏រួមបញ្ចូលទាំងប្រតិបត្តិការពីនាវា ដែលត្រូវរារាំងដោយទណ្ឌកម្មផ្សេងៗផងដែរ ហើយអាចដំណើរការដល់ថ្ងៃទី៣ ខែមេសា ឆ្នាំ ២០២៦។

រដ្ឋមន្រ្តីហិរញ្ញវត្ថុអាមេរិក លោក Scott Bessent និយាយថា ការលើកលែងនេះគឺដើម្បីឱ្យប្រេង អាចបន្តហូរចូលទៅក្នុងទីផ្សារពិភពលោក ហើយវិធានការរយៈពេលខ្លីនេះ នឹងមិនផ្តល់ប្រយោជន៍ហិរញ្ញវត្ថុធំដុំ ដល់រដ្ឋាភិបាលរុស្ស៉ីទេ ព្រោះវាអនុញ្ញាតឱ្យតែនាវាដឹកប្រេង ដែលជាប់គាំងស្រាប់លើនៅសមុទ្រប៉ុណ្ណោះ។ លោកបន្ថែម​ថា ការលក់​ទៅ​ឱ្យឥណ្ឌា​ នឹងបន្ធូរបន្ថយ​សម្ពាធ​ដែល​ប៉ុនប៉ង​ដោយអ៉ីរ៉ង់ ​ក្នុង​​ការយក​ថាមពល​ពិភពលោក​ជា​ចំណាប់ខ្មាំង។

គួរបញ្ជាក់ថា នៅក្នុងកិច្ចខិតខំប្រឹងប្រែងដ៏កម្រមួយ ដើម្បីដាក់សម្ពាធលើរុស្ស៉ី ជុំវិញការឈ្លានពានអ៊ុយក្រែន ប្រធានាធិបតីអាមេរិក លោក ដូណាល់ ត្រាំ បានដាក់ទណ្ឌកម្មលើក្រុមហ៊ុនប្រេងធំៗរបស់រុស្ស៉ី គឺ Lukoil និង Rosneft កាលពីខែវិច្ឆិកា ឆ្នាំមុន៕