(ហាណូយ)៖ ក្រសួងពាណិជ្ជកម្មនៃប្រទេសវៀតណាម បានអំពាវនាវដល់បណ្តាក្រុមហ៊ុននៅក្នុងស្រុក លើកទឹកចិត្តឱ្យបុគ្គលិកធ្វើការងារពីផ្ទះ ដើម្បីជាផ្នែកមួយជួយដល់កិច្ចប្រឹងប្រែងសន្សំសំចៃប្រេងឥន្ធនៈ ស្របពេលដែលការផ្គត់ផ្គង់កំពុងរងផលរំខាន ហើយតម្លៃហក់ឡើងខ្ពស់ ដោយសារតែវិបត្តិសង្រ្គាមអ៉ីរ៉ង់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអង្គារ ទី១០ ខែមីនា ឆ្នាំ២០២៦។

ផ្អែកលើរបាយការណ៍ក្រសួងឧស្សាហកម្មនិងពាណិជ្ជកម្ម រដ្ឋាភិបាលវៀតណាម បាននិយាយថា ប្រទេសអាស៊ានមួយនេះ ស្ថិតក្នុងចំណោមប្រទេស ដែលទទួលរងផលប៉ះពាល់ធ្ងន់ធ្ងរ ដោយសារតែផលរំខានចំពោះប្រេងឥន្ធនៈ គិតតាំងពីសង្រ្គាមអាមេរិក-អ៉ីស្រាអែលជាមួយអ៉ីរ៉ង់ បានចាប់ផ្តើម ដោយសារតែពឹងផ្អែកខ្លាំងលើការនាំចូលថាមពលពីតំបន់មជ្ឈិមបូព៌ា។

សេចក្តីថ្លែងការណ៍រដ្ឋាភិបាលវៀតណាម បានលើកឡើងថា ក្រុមហ៊ុននិងអាជីវកម្មទាំងអស់ ត្រូវលើកទឹកចិត្តដល់ការបំពេញការងារពីផ្ទះ តាមលទ្ធភាពដែលអាចទៅរួច ដើម្បីកាត់បន្ថយតម្រូវការធ្វើដំណើរនិងដឹកជញ្ជូន។ ទន្ទឹមគ្នានេះ ក្រសួងឧស្សាហកម្មនិងពាណិជ្ជកម្មវៀតណាម បានអំពាវនាវឱ្យអាជីវកម្មនិងបុគ្គល កុំនាំគ្នាទិញប្រេងឥន្ធនៈស្តុកទុក ឬឆ្លៀតឱកាសកេងចំណេញផលប្រយោជន៍។

យោងតាមទិន្នន័យពីក្រុមហ៊ុនប្រេងឥន្ធនៈលំដាប់កំពូលរបស់វៀតណាម Petrolimex តម្លៃប្រេងសាំងធម្មតានៅទីនោះ បានកើន៣២ភាគរយ សាំងម៉ាស៊ូតកើន៥៦ភាគរយ ខណៈប្រេងកាតបានកើន៨០ភាគរយ គិតចាប់តាំងពីចុងខែកុម្ភៈ ជាពេលដែលសង្រ្គាមមជ្ឈិមបូព៌ាផ្ទុះឡើង។

គួរបញ្ជាក់ថា កាលពីថ្ងៃចន្ទសប្តាហ៍នេះ រដ្ឋាភិបាលវៀណាម បានសម្រេចលុបការយកពន្ធនាំចូលជាបណ្តោះអាសន្ន​លើប្រេងឥន្ធនៈ ដែលមានប្រសិទ្ធភាពរហូតដល់ដំណាច់ខែមេសា ហើយនាយករដ្ឋមន្រ្តីវៀតណាម លោក ​Pham ⁠Minh Chinh បានទូរសព្ទទៅកាន់សមភាគីនៅកូវ៉ែត កាតា និងអេមីរ៉ាតអារ៉ាប់រួម ដើម្បីធានាការផ្គត់ផ្គង់ប្រេងឥន្ធនៈនិងប្រេងឆៅ៕