(តូក្យូ)៖ នាថ្ងៃចន្ទនេះ នាយករដ្ឋមន្រ្តីជប៉ុន លោកស្រី Sanae Takaichi បាននិយាយថា ជប៉ុននាពេលនេះមិនទាន់មានផែនការ បញ្ជូននាវាយោធាទៅអមដំណើរកប៉ាល់ដឹកប្រេង នៅតំបន់មជ្ឈិមបូព៌ាឡើយ បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកូកប្រកាសឱ្យសម្ព័ន្ធមិត្ត ជួយការពារសុវត្ថិភាពនៅច្រកសមុទ្រ Hormuz ដែលកំពុងជួបបញ្ហាសន្តិសុខដោយសារតែ​សង្រ្គាមអ៉ីរ៉ង់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី១៦ ខែមីនា ឆ្នាំ២០២៦។

លោក Takaichi បានប្រាប់សភាជប៉ុនដូច្នេះថា «យើងមិនទាន់សម្រេចចិត្តអ្វីទាំងអស់ អំពីការបញ្ជូននាវាអមដំណើរ។ យើងកំពុង​បន្តពិនិត្យមើលលើអ្វីដែលជប៉ុនអាចធ្វើបានដោយខ្លួនឯង និងអ្វីដែលអាចធ្វើបាននៅក្រោមក្របខណ្ឌច្បាប់»។ ចុងសប្តាហ៍កន្លងទៅនេះ លោក ត្រាំ បានបង្ហោះសារលើបណ្តាញសង្គម អំពាវនាវឱ្យសម្ព័ន្ធមិត្តអាមេរិក រួមមានទាំងជប៉ុន ជួយការពារការដឹកជញ្ជូនប្រេងនិង​ឧស្ម័នកាត់ច្រកសមុទ្រ Hormuz។ ប្រការនេះធ្វើឱ្យទីក្រុងតូក្យូស្ថិតលើជំហរពិបាកមួយ ដោយសារតែរដ្ឋធម្មនុញ្ញបោះបង់សង្រ្គាមរបស់ប្រទេសជប៉ុន រឹតត្បិតវិសាលភាពនៃប្រតិបត្តិការយោធា ដែលខ្លួនបានធ្វើទៅបាន។ បើតាមលោក ស្រី Takaichi អាមេរិក មិនទាន់បានស្នើសុំការជួយជាផ្លូវការ ជុំវិញបញ្ហាខាងលើនៅឡើយទេ។

ដោយឡែក នៅថ្ងៃចន្ទដដែលនេះ រដ្ឋមន្រ្តីក្រសួងដឹកជញ្ជូននៃប្រទេសអូស្រ្តាលី បានប្រកាសថា អូស្រ្តាលីនឹងមិនបញ្ជូននាវាយោធា​ទៅកាន់ច្រកសមុទ្រ Hormuz ឡើយ។ រដ្ឋមន្រ្តីលោកស្រី Catherine King បាននិយាយយ៉ាងដូច្នេះថា «យើងនឹងមិនបញ្ជូន​នាវាទៅច្រកសមុទ្រ Hormuz ទេ។ យើងដឹងថាច្រកសមុទ្រនោះមានសារសំខាន់ខ្លាំងកម្រិតណា ប៉ុន្តែវាមិនមែនជាអ្វីដែលយើង​ត្រូវបានស្នើ ឬក៏អ្វីដែលយើងនឹងចូលរួមចំណែក នោះឡើយ»។

គួរបញ្ជាក់ថា ការដឹកជញ្ជូនប្រេងចេញពីតំបន់មជ្ឈិមបូព៌ា កាត់ច្រកសមុទ្រ Hormuz ដែលទទួលបន្ទុកប្រមាណ២០ភាគរយ នៃប្រេងនិងឧស្ម័នផ្គត់ផ្គង់របស់ពិភពលោក បានជាប់គាំងសឹងទាំងស្រុង ចាប់តាំងពីអាមេរិកនិងអ៉ីស្រាអែល បានវាយប្រហារលើអ៉ីរ៉ង់ កាលពីថ្ងៃចុងខែកុម្ភៈ ហើយបានរុញច្រានឱ្យតំបន់មជ្ឈិមបូព៌ាទាំងមូល ធ្លាក់ក្នុងភ្លើងជម្លោះ៕