(ម៉ានីល)៖ ប្រធានាធិបតីហ្វីលីពីន លោក Ferdinand Marcos បានផ្អាកការដំឡើងថ្លៃសេវាដឹកជញ្ជូនសាធារណៈ ដែលទើបនឹងប្រកាសនាពេលថ្មីៗ ជាមួយការសន្យាផ្តល់ការធ្វើដំណើរដោយឥតគិតថ្លៃជំនួសវិញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃព្រហស្បតិ៍ ទី១៩ ខែមីនា ឆ្នាំ ២០២៦។

ជាប្រទេស​នាំចូល​ប្រេងឆៅ​​ពីតំបន់​មជ្ឈិមបូព៌ា សម្រាប់ការផ្គត់ផ្គង់ស្ទើរតែ​ទាំងអស់​របស់ខ្លួន ហ្វីលីពីនកំពុងខិតខំ​ដោះស្រាយ​បញ្ហាឡើងថ្លៃប្រេង ​ដោយសារតែ​សង្គ្រាម​អាមេរិក-អ៉ីស្រាអែល​ជាមួយ​អ៉ីរ៉ង់។

កាលពីថ្ងៃអង្គារ និយតករដឹកជញ្ជូនប្រទេសហ្វីលីពីន បានដំឡើងថ្លៃសេវាដឹកជញ្ជូនសាធារណៈគ្រប់ប្រភេទ។ ការចំណាយក្នុងពេលជិះរថយន្ត Jeepney ដែលប្រើប្រាស់ដោយប្រជាជនហ្វីលីពីនរាប់លាននាក់ជារៀងរាល់ថ្ងៃ នឹងកើនឡើងប្រហែល ៨ភាគរយ។

លោក Marcos បាននិយាយថា «តាមគំនិតខ្ញុំ ឥឡូវនេះ ប្រហែលមិនមែនជាពេលត្រូវដំឡើងថ្លៃសេវាកម្ម សម្រាប់ប្រជាជននោះទេ»។ លោក Marcos បានឱ្យដឹងថា លោកបានបញ្ជាឱ្យនាយកដ្ឋានដឹកជញ្ជូន ដាក់ឱ្យដំណើរការជិះដោយឥតគិតថ្លៃ នៅទូទាំងប្រទេសហ្វីលីពីន រួមជាមួយការបញ្ចុះតម្លៃសេវារថភ្លើងស្រាល និងផ្លូវដែលត្រូវបង់ប្រាក់។

គួរបញ្ជាក់ថា ខណៈសង្គ្រាមមជ្ឈិមបូព៌ាដែលកំពុងបន្ត ហ្វីលីពីន បានអនុញ្ញាតឱ្យបុគ្គលិករដ្ឋធ្វើការតែ ៤ថ្ងៃក្នុងមួយសប្តាហ៍ និងផ្តល់ប្រាក់ឧបត្ថម្ភដល់អ្នកបើកបររ៉ឺម៉កកង់បី ហើយរោងចក្រចម្រាញ់ប្រេងតែមួយគត់ ក៏បើកការពិភាក្សាដើម្បីទិញប្រេងរបស់រុស្ស៉ីផងដែរ៕