(ប៉េកាំង)៖ រដ្ឋមន្រ្តីការបរទេសចិន លោក Wang Yi បានអំពាវនាវកាលពីថ្ងៃអង្គារសប្តាហ៍នេះ ដល់ភាគីទាំងអស់ចាប់យកឱកាសដើម្បីចរចារកសន្តិភាព ឱ្យបានឆាប់តាមដែលអាចធ្វើទៅបាន នៅពេលជជែកតាមទូរស័ព្ទជាមួយរដ្ឋមន្រ្តីការបរទេសអ៉ីរ៉ង់ លោក Abbas ​Araqchi។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Reuters នាថ្ងៃពុធ ទី២៥ ខែមីនា ឆ្នាំ២០២៦។

តាមសេចក្តីថ្លែងការណ៍របស់ក្រសួងការបរទេសចិន លោក Wang បានប្រាប់ លោក Araqchi ថាការនិយាយតែងតែប្រសើរជាងការប្រយុទ្ធគ្នា ដោយបន្ថែមថា រាល់បញ្ហាដែលមិនយល់ស្រប គួរតែត្រូវបានដោះស្រាយដោយការសន្ទនា និងចរចា មិនមែនដោយប្រើកម្លាំងនោះទេ។

យោងតាមប្រព័ន្ធផ្សព្វផ្សាយរដ្ឋអ៉ីរ៉ង់នាថ្ងៃពុធនេះ លោក Araqchi បានឆ្លើយតបដោយទៅកាន់លោក Wang ដោយនិយាយថា ការរំពឹងទុករបស់អ៉ីរ៉ង់ ចំពោះប្រទេសសមាជិកនៃក្រុមប្រឹក្សាសន្តិសុខ ជាពិសេសចិន និងរុស្ស៉ី នោះគឺរារាំងសហរដ្ឋអាមេរិកពីការបន្តបំពានអំណាចក្រុមប្រឹក្សា តាមរយៈប្រកាន់ជំហរយ៉ាងម៉ឺងម៉ាត់ ក្នុងការថ្កោលទោសការឈ្លានពានរបស់សហរដ្ឋអាមេរិក និងអ៉ីស្រាអែល៕