(កៀវ)៖ អនុប្រធានគណៈកម្មការសហភាពអឺរ៉ុប (EU) លោកស្រី Kaja Kallas និងរដ្ឋមន្រ្តីការបរទេសនៃប្រទេសជាសមាជិក បានទៅដល់ទីក្រុងកៀវ នាថ្ងៃអង្គារ ទី៣១ ខែមីនា ដើម្បីចូលរួមពិធីរំលឹកខួបលើកទី ៤នៃការសម្លាប់រង្គាលក្នុងទីក្រុង Bucha និងបង្ហាញការគាំទ្រដល់អ៊ុយក្រែន ចំពេលមានភាពតានក្នុងប្លុកជុំវិញការផ្តល់ជំនួយ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

រដ្ឋមន្ត្រីការបរទេសអ៊ុយក្រែន លោក Andrii ⁠Sybiha បានស្វាគមន៍ លោកស្រី Kallas និងមន្ត្រីជាន់ខ្ពស់ EU ផ្សេងទៀត នៅឯស្ថានីយរថភ្លើងភាគកណ្តាលទីក្រុងកៀវ។ លោក Sybiha គូសបញ្ជាក់ថា «យើងរំលឹកខួបដ៏ក្រៀមក្រំនៃការសម្លាប់រង្គាលក្រុង Bucha។ ការទទួលខុសត្រូវពីរុស្ស៉ី គឺមានសារៈសំខាន់ណាស់ ក្នុងការស្តារយុត្តិធម៌នៅអឺរ៉ុប ហើយយើងនឹងជំរុញកិច្ចខិតខំប្រឹងប្រែងនេះ»។

គួរបញ្ជាក់ថា ទីក្រុង Bucha ស្ថិតនៅចម្ងាយប្រហែល ២៥គីឡូម៉ែត្រពីរដ្ឋធានីកៀវ។ អ៊ុយក្រែនថាទាហានរុស្ស៉ី បានសម្លាប់មនុស្សជាង ៤០០នាក់នៅក្នុងទីក្រុងនេះ តែទីក្រុងមូស្គូបានបដិសេធពីការប្រព្រឹត្តអំពើឃោរឃៅ និងបានចោទប្រកាន់អ៊ុយក្រែនថាជាអ្នករៀបចំឧប្បត្តិហេតុនោះ៕